ആഗോള ബോക്‌സ് ഓഫീസിൽ 236 കോടി നേടി ഷാരൂഖ് ചിത്രം ‘ജവാന്‍’. സെപ്തംബർ 7 ന് റിലീസ് ചെയ്ത ചിത്രം വെറും രണ്ടു ദിവസം കൊണ്ടാണ് 236 കോടി നേടി ബോക്‌സ് ഓഫീസില്‍ കുതിപ്പ് തുടരുന്നത്. വാരാന്ത്യത്തിൽ കഴിഞ്ഞ ദിവസങ്ങളേക്കാൾ വരുമാനം കൂടുമെന്നാണ് റിപ്പോർട്ടുകൾ.
റിലീസ് ദിനത്തിൽ 75 കോടിയാണ് ചിത്രം സ്വന്തമാക്കിയത്. ഹിന്ദിയിൽ നിന്ന് 65 കോടിയും തമിഴ്, തെലുങ്ക് ഡബ്ബിങ്ങിൽ നിന്ന് 10 കോടിയോളവും ജവാൻ നേടിയിരുന്നു. ഇന്ത്യന്‍ സിനിമയുടെ ചരിത്രത്തില്‍ ഇതാദ്യമായാണ് റിലീസ് ദിനത്തിൽ ഒരു ചിത്രം ഇത്രയധികം വരുമാനം നേടുന്നത്. ഈ വര്‍ഷം റിലീസ് ചെയ്ത പഠാന്റെ റെക്കോഡാണ് ജവാന്‍ തകര്‍ത്തത്.
അതേസമയം വന്‍ പ്രതീക്ഷയോടെ ബോക്‌സ് ഓഫീസിലേക്ക് എത്തിയ ‘ജവാന്‍’ സിനിമയുടെ എച്ച് ഡി പതിപ്പ് ചോർന്നുവെന്ന് അവർത്തകൾ ഇതിനിടെ വന്നിരുന്നു. സിനിമയുടെ എച്ച്ഡി പതിവ് വിവിധ സൈറ്റുകളിലും ടെലഗ്രാമിലും എത്തിയിട്ടുള്ളതായാണ് റിപ്പോർട്ടുകൾ. എന്നിരുന്നാലും ബുക്കിങ്ങില്‍ ഇടിവ് സംഭവിച്ചിട്ടില്ല എന്നതാണ് ആശ്വാസം നല്‍കുന്നത്.
നയന്‍താരയാണ് ചിത്രത്തില്‍ നായികയായത്. നയന്‍താരയുടെ ബോളിവുഡ് അരങ്ങേറ്റ ചിത്രമാണ് ജവാന്‍. കൂടാതെ വിജയ് സേതുപതി, പ്രിയാമണി, യോഗി ബാബു എന്നിവരും ചിത്രത്തിലുണ്ട്. ദീപിക പദുക്കോണ്‍, സഞ്ജയ് ദത്ത് എന്നിവരും ചിത്രത്തിലുണ്ട്.