തന്റെ തിരിച്ചുവരവില്‍ ബോളിവുഡിലും തിളങ്ങുകയാണ് നടി ജ്യോതിക. ‘ശെയ്ത്താന്‍’, ‘ശ്രികാന്ത്’ എന്നീ ചിത്രങ്ങള്‍ക്ക് ശേഷം ‘ഡബ്ബ കാര്‍ട്ടല്‍’ എന്ന ഹിന്ദി വെബ് സീരിസ് ആണ് ജ്യോതികയുടെതായി റിലീസിന് ഒരുങ്ങുന്നത്. ഹിതേഷ് ഭാട്ടിയ സംവിധാനം ചെയ്ത വെബ് സീരിസ് ഫെബ്രുവരി 28ന് ആണ് നെറ്റ്ഫ്‌ളിക്‌സില്‍ സ്ട്രീമിങ് ആരംഭിക്കുന്നത്. സീരിസിന്റെ ട്രെയ്‌ലര്‍ ലോഞ്ചിനിടെ ജ്യോതികയെ കുറിച്ച് നടി ശബാന ആസ്മി പറഞ്ഞ കാര്യങ്ങളാണ് ഇപ്പോള്‍ ചര്‍ച്ചയാകുന്നത്.
സീരിസില്‍ നിന്നും ജ്യോതികയെ മാറ്റാനായി താന്‍ നിര്‍മ്മാതാക്കളോട് ആവശ്യപ്പെട്ടിരുന്നു എന്നാണ് ശബാന ആസ്മി വെളിപ്പെടുത്തിയിരിക്കുന്നത്. എന്നാല്‍ അന്ന് അങ്ങനെ പറഞ്ഞതില്‍ ഇപ്പോള്‍ ഖേദിക്കുന്നുണ്ട് എന്നുമാണ് താരം തുറന്നു പറഞ്ഞിരിക്കുന്നത്. ”സീരിസില്‍ നിന്നും രണ്ട് പെണ്‍കുട്ടികളെ മാറ്റാന്‍ ഞാന്‍ ശ്രമിച്ചു. അതിലൊന്ന് ജ്യോതികയാണ്.”
”അവള്‍ക്ക് ഇതിനെ കുറിച്ച് അറിയില്ല, ഇവള്‍ വേണ്ട മറ്റാരെയെങ്കിലും കാസ്റ്റ് ചെയ്യാന്‍ ഞാന്‍ ആവശ്യപ്പെട്ടു. എന്നാല്‍ ജ്യോതികയെ മാറ്റാന്‍ ഒരുക്കമല്ലെന്ന് നിര്‍മ്മാതാക്കള്‍ എന്നോട് പറഞ്ഞു. പക്ഷെ ജ്യോതിക ഇന്ന് കൂടെയുള്ളതില്‍ എനിക്ക് നല്ല സന്തോഷമുണ്ട്. അന്ന് എനിക്ക് ഒരു തെറ്റുപറ്റിയതാണ്. നിങ്ങളോടൊപ്പം പ്രവര്‍ത്തിച്ചപ്പോള്‍ അതിയായ സന്തോഷം തോന്നി” എന്നാണ് ട്രെയ്‌ലര്‍ ലോഞ്ചിനിടെ ശബാന ആസ്മി പറഞ്ഞത്.
അതേസമയം, അഞ്ച് വീട്ടമ്മമാരുടെ കഥയാണ് പറയുന്നത്. മയക്കുമരുന്ന് വിതരണത്തെ ചുറ്റിപ്പറ്റിയാണ് സീരിസിന്റെ പ്രമേയം. നിമിഷ സജയന്‍, ഗജ്‌രാജ് റാവോ, ശാലിനി പാണ്ഡേ, ലില്ലിത് ഡൂബേ, അഞ്ജലി ആനനന്ദ്, സായ് ടാംഹങ്കര്‍, ജിഷു സെന്‍ഗുപ്ത, ഭൂപേന്ദ്ര സിങ് ജടാവത് എന്നിവരാണ് സീരിസിലെ പ്രധാന താരങ്ങള്‍.