സല്മാന് ഖാന്റെ നായികയായി രശ്മിക മന്ദാന എത്തുന്ന ‘സിക്കന്ദര്’ സിനിമ മാര്ച്ച് 30ന് തിയേറ്ററുകളിലേക്ക് എത്തുകയാണ്. ഇതിനിടെ കടുത്ത വിമര്ശനമാണ് സല്മാനെതിരെ ഉയര്ന്നു കൊണ്ടിരിക്കുന്നത്. ഇരുവരുടെയും പ്രായവ്യാത്യാസമാണ് സോഷ്യല് മീഡിയയില് ചര്ച്ചയായി കൊണ്ടിരിക്കുന്നത്. സല്മാന് ഖാനേക്കാള് 31 വയസ് ഇളയതാണ്. ഇതാണ് ചര്ച്ചയാകുന്നത്.
ഈ വിഷയത്തില് പ്രതികരിച്ചിരിക്കുകയാണ് സല്മാന് ഖാന് ഇപ്പോള്. നായികയ്ക്കോ അവരുടെ പിതാവിനോ പ്രശ്നമില്ലെങ്കില് മറ്റുള്ളവര്ക്ക് എന്താണ് പ്രശ്നമെന്ന് നടന് ചോദിക്കുന്നത്. മാത്രമല്ല, രശ്മികയ്ക്ക് മകള് ഉണ്ടാവുമ്പോള് അവള്ക്കൊപ്പവും അഭിനയിക്കും എന്നാണ് സല്മാന് പറയുന്നത്.
”ഞാനും ചിത്രത്തിലെ നായികയും തമ്മില് 31 വയസിന്റെ പ്രായവ്യത്യാസമുണ്ടെന്ന് പലരും പറയുന്നു. നായികയ്ക്കോ അവരുടെ പിതാവിനോ പ്രശ്നമില്ലെങ്കില് നിങ്ങള്ക്ക് എന്താണ് പ്രശ്നം? രശ്മിക വിവാഹം കഴിച്ച് ഒരു മകളുണ്ടാകുകയും അവള് വലിയ താരമാകുകയും ചെയ്താല് ഞാന് അവള്ക്കൊപ്പവും ചേര്ന്ന് പ്രവര്ത്തിക്കും. അമ്മയുടെ അനുവാദം വാങ്ങിയിട്ടായിരിക്കും ഇത് ചെയ്യുക” എന്നാണ് സല്മാന് പറയുന്നത്.
ചിത്രത്തിന്റെ ട്രെയ്ലര് ലോഞ്ചുമായി ബന്ധപ്പെട്ട് മുംബൈയില് എത്തിയപ്പോഴായിരുന്നു സല്മാന്റെ പ്രതികരണം. രശ്മിക സിനിമയുടെ ഭാഗമായതില് സല്മാന് നടിയെ പ്രശംസിക്കുകയും ചെയ്യുന്നുണ്ട്. ”അവര് രാത്രി 7 മണിക്ക് പുഷ്പ 2വിന്റെ ഷൂട്ടിങ് അവസാനിപ്പിച്ച് 9 മണിക്ക് ഞങ്ങള്ക്കൊപ്പം ചേരുമായിരുന്നു.”
”രാവിലെ 6.30 വരെ അത് തുടരും. പിന്നീട് പുഷ്പ 2വില് അഭിനയിക്കാനായി പോകും. കാലിന് പരിക്ക് പറ്റിയിട്ടും ഞങ്ങള്ക്കൊപ്പം ഷൂട്ടിങ് തുടര്ന്നു. ഒരു ദിവസം പോലും ഷൂട്ടിങ് ഒഴിവാക്കിയില്ല” എന്നാണ് സല്മാന് പറയുന്നത്. അതേസമയം, എആര് മുരുഗദോസിന്റെ സംവിധാനത്തില് ഒരുങ്ങുന്ന ചിത്രമാണ് സിക്കന്ദര്.