ആലിയ ഭട്ടിനെ ആദ്യമായി കാണുമ്പോള് തനിക്ക് പ്രായം 20 വയസ് ആയിരുന്നുവെന്ന് രണ്ബിര് കപൂര്. ആലിയക്ക് അന്ന് 9 വയസ് ആയിരുന്നു പ്രായം. സഞ്ജയ് ലീല ബന്സാലിയുടെ ‘ബാലിക വധു’ എന്ന ചിത്രത്തിന് വേണ്ടി നടത്തിയ ഫോട്ടോഷൂട്ടിന് വേണ്ടി എത്തിയപ്പോഴായിരുന്നു ഇരുവരും ആദ്യമായി കണ്ടുമുട്ടുന്നത്.
വര്ഷങ്ങള്ക്ക് ശേഷമാണ് ഇരുവരും പ്രണയത്തിലാകുന്നതും വിവാഹിതരാകുന്നതും. ആലിയയെ കുറിച്ച് രണ്ബിര് കപൂര് പറഞ്ഞ വാക്കുകള് ശ്രദ്ധ നേടുകയാണ്. ”ആലിയ എന്നേക്കാള് 11 വയസ്സിന് ഇളയതാണ്. ആലിയയുമായുള്ള ആദ്യ കൂടിക്കാഴ്ച വളരെ രസകരമായിരുന്നു. അന്ന് ആലിയയ്ക്ക് പ്രായം 9 വയസ്സ്, എനിക്ക് 20.”
”ഞങ്ങളൊരു ഫോട്ടോഷൂട്ട് നടത്തി. സഞ്ജയ് ലീലാ ബന്സാലിയ്ക്ക് ബാലികാ വധു എന്നൊരു സിനിമ ചെയ്യണം എന്നുണ്ടായിരുന്നു. ബാല വിവാഹത്തെ കുറിച്ചായിരുന്നു. അന്നാണ് ഞങ്ങള് ആദ്യം കണ്ടത്. അതിപ്പോള് ഓര്ക്കുമ്പോള് അല്പ്പം വിചിത്രമാണ്. അന്ന് ഞാന് ബന്സാലിയുടെ അസിസ്റ്റന്റായി ജോലി ചെയ്യുകയാണ്.”
”എന്റെ കയ്യില് ഇപ്പോഴും ആ ഫോട്ടോഷൂട്ടിന്റെ ചിത്രങ്ങളുണ്ട്. ഈ വര്ഷങ്ങള്ക്കിടയില് ഒരുപാട് പേരെ കണ്ടിട്ടുണ്ടെങ്കിലും ആലിയ എപ്പോഴും വളരെ സ്പെഷല് ആയൊരു ആളായി എനിക്കു തോന്നിയിട്ടുണ്ട്. ആലിയ എന്ന അഭിനേത്രിയോട് എനിക്ക് ഒരുപാട് ആരാധനയുണ്ട്. ഒരു അഭിനേതാവ്, കലാകാരി, വ്യക്തി, മകള്, സഹോദരി എന്നീ നിലകളില് എനിക്ക് അവളോട് വളരെയധികം ബഹുമാനമുണ്ട്.”
”അവള് എനിക്ക് ചിരി സമ്മാനിക്കുന്നു. ഒരുമിച്ചു സിനിമ കാണുക, ചിരിക്കുക, ചാറ്റ് ചെയ്യുക, അതാണ് പ്രണയം. എന്റെ ഏറ്റവും അടുത്ത ഒരു സുഹൃത്തിനെ തന്നെ വിവാഹം കഴിക്കാന് കഴിഞ്ഞതില് ഞാന് ഭാഗ്യവാനാണ്. ആലിയ എന്റെ ഏറ്റവും നല്ല സുഹൃത്താണ്, ഞങ്ങള്ക്ക് ചാറ്റ് ചെയ്യാം, ചിരിക്കാം. അതില് ഞാന് ശരിക്കും ഭാഗ്യവാനാണ്” എന്നാണ് രണ്ബിര് പറയുന്നത്.