നടി രാകുല്‍ പ്രീത് സിംഗ് വിവാഹിതയാകുന്നു. നടനും നിര്‍മാതാവുമായ ജാക്കി ഭഗ്‌നാനിയാണ് വരന്‍. 2024 ഫെബ്രുവരി 22ന് ഗോവയില്‍ വെച്ചാകും വിവാഹം നടക്കുക എന്നാണ് റിപ്പോര്‍ട്ടുകള്‍. ദീര്‍ഘനാളായി രാകുലും ഭഗ്നാനിയും പ്രണയത്തിലാണ്. 2021ല്‍ ആണ് ജാക്കിയുമായുള്ള പ്രണയത്തെ കുറിച്ച് നടി വെളിപ്പെടുത്തുന്നത്.
റിപ്പോര്‍ട്ടുകള്‍ അനുസരിച്ച് അടുത്ത ബന്ധുക്കളുടെയും സുഹൃത്തുകളുടെയും സാന്നിധ്യത്തിലാകും വിവാഹം. ഗോവയില്‍ ബീച്ച് വെഡിങ് നടത്താനാണ് താരങ്ങള്‍ ആലോചിക്കുന്നത്. എന്നാല്‍ വിവാഹത്തെ കുറിച്ച് രാകുലോ ജാക്കിയോ പ്രതികരിച്ചിട്ടില്ല. അതേസമയം, കന്നഡ സിനിമയിലൂടെയായിരുന്നു രാകുലിന്റെ അരങ്ങേറ്റം.
2009ല്‍ പുറത്തിറങ്ങിയ ‘ഗില്ലി’യാണ് ആദ്യ സിനിമ. പിന്നീട് താരം തെലുങ്കിലേക്കും തമിഴിലിലേക്കുമെത്തി. ‘യാരിയാന്‍’ ആണ് രാകുലിന്റെ ആദ്യത്തെ ബോളിവുഡ് ചിത്രം. ‘അയലാന്‍’, ‘ഇന്ത്യന്‍ 2’, ‘മേരി പത്‌നി കാ റീമേക്ക്’ എന്നീ ചിത്രങ്ങളാണ് താരത്തിന്റെതായി ഇനി പുറത്തിറങ്ങാനിരിക്കുന്ന ചിത്രങ്ങള്‍.
‘രഹ്നാ ഹേ തേരെ ദില്‍ മേം’ എന്ന ബോളിവുഡ് ചിത്രത്തിലൂടെയാണ് ജാക്കി ഭഗ്നാനി സിനിമയില്‍ എത്തുന്നത്. 2018ല്‍ പുറത്തിറങ്ങിയ ‘മോഹനി’ ആണ് താരം അഭിനയിച്ച് പുറത്തിറങ്ങിയ സിനിമ. താരം നിര്‍മ്മിച്ച ‘ഗണ്‍പത് 2’, ‘സൂര്യപുത്ര മഹാവീര്‍ കര്‍ണ’, ‘മിഷന്‍ ലയണ്‍’ എന്നീ സിനിമകളാണ് റിലീസിന് ഒരുങ്ങുന്നത്.
