എല്ലാ കണ്ണുകളും റഫയിലേക്ക് എന്ന ക്യാംപെയ്നുമായി ബോളിവുഡ് താരങ്ങള്. പലസ്തീനോട് ഐക്യദാര്ഢ്യം പ്രകടിപ്പിച്ച് നിരവധി താരങ്ങളാണ് ഓള് ഐസ് ഓണ് റഫ എന്ന പോസ്റ്റര് പങ്കുവച്ച് രംഗത്തെത്തിയത്. ഇതോടെ ‘ബോയ്കോട്ട് ബോളിവുഡ്’ എന്ന ഹാഷ്ടാഗ് സോഷ്യല് മീഡിയയില് ട്രെന്ഡിംഗ് ആയിരിക്കുകയാണ്.
പലസ്തീന് ഐക്യദാര്ഢ്യം പ്രഖ്യാപിച്ച താരങ്ങള്ക്കെതിരെ കടുത്ത രീതിയിലുള്ള സൈബര് ആക്രമണമാണ് നടന്നു കൊണ്ടിരിക്കുന്നത്. ആലിയ ഭട്ട്, കരീന കപൂര്, ദിയ മിര്സ, റിച്ച ഛദ്ദ, വരുണ് ധവാന്, രശ്മിക മന്ദാന, സാമന്ത തുടങ്ങി നിരവധി താരങ്ങള് പോസ്റ്റര് പങ്കുവച്ചിട്ടുണ്ട്.
നടി മാധുരി ദീക്ഷിത്തും പോസ്റ്റര് പങ്കുവച്ചെങ്കിലും സൈബര് ആക്രമണം നടന്നതോടെ താരം പോസ്റ്റ് ഡിലീറ്റ് ചെയ്തത് സോഷ്യല് മീഡിയയില് വലിയ ചര്ച്ചയായിട്ടുണ്ട്. ഇതോടെ താരത്തിന്റെ നിലപാടിനെ രൂക്ഷമായി വിമര്ശിച്ചും പലരും സോഷ്യല് മീഡിയയില് എത്തുന്നുണ്ട്.
ചിലര് പോസ്റ്റിടുന്നു, പിന്നീടത് ഡിലീറ്റ് ചെയ്യുന്നു. അവര് എന്തുതന്നെ ചിന്തിച്ചാലും കാര്യം വളരെ ദയനീയമാണ്. വളരെ നിരാശപ്പെടുത്തുന്നതും, എതിര്പ്പുകളെ ഭയന്ന് നിങ്ങള് പോസ്റ്റ് ഡിലീറ്റ് ചെയ്യരുതയായിരുന്നു.. എന്നിങ്ങനെയുള്ള കമന്റുകളാണ് സോഷ്യല് മീഡിയയില് എത്തുന്നത്.
അതേസമയം, ബോയ്കോട്ട് ബോളിവുഡ് ട്രെന്ഡിനെതിരെ രൂക്ഷമായി പ്രതികരിച്ച് സംവിധായികയും നടിയുമായ പൂജാ ഭട്ട് രംഗത്തെത്തിയിട്ടുണ്ട്. ഈ പോസ്റ്റിന് നേരെയും വിമര്ശനങ്ങള് എത്തുന്നുണ്ട്. ലവ് ജിഹാദിനെതിരെയും, പാകിസ്താന്, ബംഗ്ലാദേശ് എന്നിവിടങ്ങളിലെ ഹിന്ദുക്കള്ക്ക് വേണ്ടി അപലപിക്കാനും ബോളിവുഡ് താരങ്ങള് തയാറാകുന്നിലെന്നാണ് ചില കമന്റുകള്.
”ഇത് വീണ്ടും ആരംഭിക്കുന്നു! പലസ്തീനില് നടക്കുന്ന അതിക്രമങ്ങള്ക്കെതിരെ കൂട്ടായി സംസാരിക്കുന്നതിന് എന്റര്ടൈന്മെന്റ് ഇന്ഡസ്ട്രി നല്കുന്ന വില” എന്നാണ് ബോയ്കോട്ട് ബോളിവുഡ് ഹാഷ്ടാഗിന്റെ സ്ക്രീന് ഷോട്ട് പങ്കുവെച്ച് കൊണ്ട് പൂജാ ഭട്ട് കുറിച്ചത്. എല്ലാ കണ്ണുകളും റഫായിലേക്ക് എന്ന ഹാഷ്ടാഗും പൂജ കുറിച്ചിട്ടുണ്ട്.