ബോളിവുഡില് വീണ്ടുമൊരു താരവിവാഹം ഒരുങ്ങുന്നു. നടി പരിനീതി ചോപ്രയും ആം ആദ്മി പാര്ട്ടി നേതാവായ രാഘവ് ഛദ്ദയും വിവാഹിതരാകുന്നു എന്നാണ് റിപ്പോര്ട്ടുകള്. ഇരുവരും പ്രണയത്തിലാണെന്ന അഭ്യൂഹങ്ങള് കഴിഞ്ഞ ദിവസങ്ങളില് പ്രചരിച്ചിരുന്നു.
ഒന്നിച്ച് ഭക്ഷണം കഴിക്കാനെത്തിയ വീഡിയോ എത്തിയതോടെയാണ് ഇരുവരും ഡേറ്റിംഗിലാണെന്ന് സോഷ്യല് മീഡിയ കണ്ടെത്തിയത്. ഇരുവരും വിവാഹിതരാവാന് പോകുന്നുവെന്ന അഭ്യൂഹത്തിനിടെയാണ് എ.എ.പി എംപി സഞ്ജീവ് അറോറയുടെ ട്വീറ്റ് എത്തിയിരിക്കുന്നത്. ഇരുവരെയും അഭിന്ദിച്ചു കൊണ്ടാണ് എംപിയുടെ ട്വീറ്റ്.
”രാഘവ് ഛദ്ദയെയും പരിനീതി ചോപ്രയെയും എന്റെ ഹൃദയം നിറഞ്ഞ അഭിനന്ദനങ്ങള് അറിയിക്കുന്നു. അവരുടെ കൂടിച്ചേരല് സ്നേഹവും സന്തോഷവും സഹവര്ത്തിത്വവും കൊണ്ട് അനുഗ്രഹിക്കപ്പെടട്ടെ. എന്റെ ആശംസകള്” എന്നാണ് സഞ്ജീവ് അറോറയുടെ ട്വീറ്റ്.
ഇതോടെയാണ് പരിനീതി വിവാഹിതയാകാന് ഒരുങ്ങുകയാണെന്ന റിപ്പോര്ട്ടുകള് എത്തിയത്. എന്നാല് രാഘവ് ഛദ്ദയോ പരിനീതി ചോപ്രയോ ഈ ട്വീറ്റിനോടോ വിവാഹ വാര്ത്തകളോടെ പ്രതികരിച്ചിട്ടില്ല. അതേസമയം, പരിനീതിയും രാഘവ് ഛദ്ദയും ലണ്ടന് സ്കൂള് ഓഫ് ഇക്കണോമിക്സില് സഹപാഠികളായിരുന്നു.
ട്വിറ്ററില് 44 പേരെ മാത്രമാണ് രാഘവ് ഫോളോ ചെയ്യുന്നത്. അതില് സിനിമാ മേഖലയില് നിന്ന് രണ്ടു പേരെയുള്ളൂ. ഒന്ന് ആം ആദ്മി പാര്ട്ടി അംഗം കൂടിയായ ഗുല് പനാഗ്. രണ്ടാമത്തേത് പരിനീതിയും. പരിനീതിയുമായുള്ള ബന്ധം രാജ്യസഭയിലും രാഘവിന് നല്കിയ ചെയര്മാന്റെ മറുപടിയിലും കടന്നുവന്നിരുന്നു.
സോഷ്യല് മീഡിയയില് നിങ്ങള് ഇതിനോടകം ആവശ്യത്തിനിടം കൈവരിച്ചിട്ടുണ്ട് എന്നായിരുന്നു സംഭവത്തില് രാജ്യസഭ ചെയര്മാന് ജഗ്ദീപ് ധന്കറിന്റെ പരിഹാസം. വിവാഹ വാര്ത്തയെ കുറിച്ച് ചോദിച്ച മാധ്യമപ്രവര്ത്തകരോട് തന്റെ രാഷ്ട്രീയത്തെ കുറിച്ച് ചോദിക്കു എന്നായിരുന്നു രാഘവിന്റെ മറുപടി.