കരീന കപൂർ നിർമ്മിച്ച ആദ്യ ചിത്രമായ ‘ദി ബക്കിങ്ഹാം മർഡേഴ്സ്'(The Buckingham Murders) ഈ വർഷത്തെ ലണ്ടൻ ഫിലിം ഫെസ്റ്റിവലിൽ പ്രദർശിപ്പിക്കും. ഹൻസൽ മേഹ്ത സംവിധാനം ചെയ്ത ചിത്രത്തിൽ കരീന കപൂർ തന്നെയാണ് പ്രധാന കഥാപാത്രമായ ജസ്മീത്ത് ബംറ എന്ന കുറ്റാന്വേഷകയുടെ റോളിൽ എത്തുന്നത്.വ്യക്തിപരമായ ട്രോമയും,അഭയാർഥി പ്രശ്നങ്ങളും ചിത്രം കൈകാര്യം ചെയ്യുന്നു. കരീന കപൂറും ബാലാജി ടെലിഫിലിംസും ചേർന്നാണ് സിനിമ നിർമ്മിച്ചിരിക്കുന്നത്.
കരീന കപൂറിനെ കൂടാതെ കെയ്ത് അലനും ക്രിസ് വിൽസണും ഹാകി അലിയും ഡാനിയൽ എഗ്ഹാനുമാണ് മറ്റ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്. അസീം അറോറ,രാഗവ് കാക്കർ, കശ്യപ് കപൂർ എന്നിവർ ചേർന്നാണ് സിനിമയുടെ തിരക്കഥയെഴുതിയിരിക്കുന്നത്.ഛായാഗ്രഹണം നിർവഹിച്ചിരിക്കുന്നത് എമ്മ ഡേൽസ്മാനാണ്. അഭിനയ രംഗത്ത്നിന്നും സിനിമ നിർമ്മാണത്തിലേക്കുള്ള കരീന കപൂറിന്റെ ആദ്യ ചുവടുവെപ്പാണ് ഈ ചിത്രത്തിലൂടെ നടക്കുന്നത്. ചിത്രം ഈ വർഷം ഒക്ടോബർ 14,15 തീയ്യതികളിൽ ഫെസ്റ്റിവലിൽ പ്രദർശിപ്പിക്കും.
കൂടാതെ ഡേവിഡ് ഫിഞ്ചറുടെ ‘ദി കില്ലർ’ മാർട്ടിൻ സ്കോർസെസെയുടെ ‘ദി കില്ലേഴ്സ് ദി ഓഫ് ഫ്ലവർ മൂൺ’ യോർഗോസ് ലാന്തിമോസിന്റെ ‘പൂവർ തിങ്സ്’ ബ്രാഡ്ലി കൂപ്പറുടെ ‘മേസ്ട്രോ’ എന്നീ സിനിമകളും ഫെസ്റ്റിവലിൽ പ്രദർശിപ്പിക്കുന്നുണ്ട് എന്നത് ശ്രദ്ധേയമാണ്. 2023 ഒക്ടോബർ 4 മുതൽ 15 വരെയുള്ള ഫെസ്റ്റിവലിലെ ഉദ്ഘാടന ചിത്രം എമറാൾഡ് ഫെനെലിന്റെ ‘സാൾട്ട് ബേൺ’ സമാപന ചിത്രം കിവ്ബീ തവറെസ് സംവിധാനം ചെയ്ത ‘ദി കിച്ചൺ’ എന്നിവയാണ്.