‘തേജസ്’ പൂര്ണമായും പരാജയമായതോടെ ക്ഷേത്ര ദര്ശനം നടത്തി നടി കങ്കണ റണാവത്ത്. കുറച്ചുദിവസങ്ങളായി തന്റെ ഹൃദയം അസ്വസ്ഥമാണെന്നും സമാധാനം ലഭിക്കാന് വേണ്ടിയാണു ക്ഷേത്ര ദര്ശനം നടത്തിയതെന്നും കങ്കണ എക്സ് പ്ലാറ്റ്ഫോമില് കുറിച്ചു.
ക്ഷേത്രം സന്ദര്ശിച്ചതിന്റെ ചില ചിത്രങ്ങളും അവര് പങ്കുവച്ചു. കങ്കണ റണാവത്തിന്റ കഴിഞ്ഞ എട്ട് വര്ഷത്തെ കരിയറില് ഏറ്റവും വലിയ പരാജയമാണ് ‘തേജസ്’ എന്ന പുതിയ ചിത്രം നേരിട്ടത്. 60 കോടിയില് അധികം മുതല്മുടക്കില് നിര്മിച്ച ചിത്രം ഇതുവരെ കഷ്ടിച്ച് അഞ്ച് കോടി രൂപ മാത്രമാണ് നേടിയത്.
ഇതിന് പിന്നാലെയാണ് കങ്കണ ക്ഷേത്ര ദര്ശനത്തിനായി എത്തിയത്. ”കുറച്ച് ദിവസങ്ങളായി എന്റെ ഹൃദയം വല്ലാതെ അസ്വസ്ഥമായിരുന്നു, ദ്വാരകാധീഷ് സന്ദര്ശിക്കാന് എനിക്ക് തോന്നി, ശ്രീകൃഷ്ണന്റെ ഈ ദിവ്യനഗരമായ ദ്വാരകയില് കാല് കുത്തിയ ഉടനെ എന്റെ ആശങ്കകളെല്ലാം അസ്തമിച്ചതായി തോന്നുന്നു.”
”എന്റെ മനസ് സ്ഥിരമായി, എനിക്ക് അനന്തമായ സന്തോഷം തോന്നി. അല്ലയോ ദ്വാരകയുടെ നാഥാ, അങ്ങയുടെ അനുഗ്രഹം എന്നും എന്റെ കൂടെ ഉണ്ടാകട്ടെ. ഹരേ കൃഷ്ണ” എന്നാണ് ക്ഷേത്രദര്ശനത്തിന്റെ ചിത്രങ്ങള് പങ്കുവച്ചുകൊണ്ട് കങ്കണ എക്സില് കുറിച്ചിരിക്കുന്നത്.
കങ്കണയുടെ കരിയറിലെ 11-ാമത്തെ ബോക്സ് ഓഫീസ് പരാജയമാണ് തേജസ്. 2015ല് പുറത്തിറങ്ങിയ തനു വെഡ്സ് മനു എന്ന ഹിറ്റിന് ശേഷം, ഐ ലവ് എന്വൈ, കട്ടി ബട്ടി, റംഗൂണ്, സിമ്രാന്, ജഡ്ജ്മെന്റല് ഹേ ക്യാ, പങ്ക എന്നീ സിനിമകള് പരാജയമായിരുന്നു. 2019ല് പുറത്തിറങ്ങിയ മണികര്ണിക മാത്രമാണ് ആവറേജ് ഹിറ്റ് ആയത്.