‘ഗദ്ദര് 2’വിലൂടെ ബോളിവുഡില് ഗംഭീര തിരിച്ചുവരവ് നടത്തിയിരിക്കുകയാണ് നടന് സണ്ണി ഡിയോള്. ചിത്രം ഇതുവരെ 400 കോടിയിലധികം കലക്ഷന് നേടിയെന്നാണ് റിപ്പോര്ട്ട്. അക്ഷയ് കുമാറിന്റെ ‘ഓഎംജി 2’ ചിത്രത്തിനെ വെല്ലുവിളിച്ച് കൊണ്ടാണ് ഗദര് ചിത്രത്തിന്റെ നേട്ടം.
ഇതിനിടെ അക്ഷയ് കുമാര് സണ്ണി ഡിയോളിനെ സാമ്പത്തികമായി സഹായിച്ചു എന്ന വാര്ത്തകളാണ് എത്തുന്നത്. സണ്ണി ഡിയോളിന്റെ കടം വീട്ടി ജുഹുവിലെ ബംഗ്ലാവ് ലേലത്തില് നിന്നും അക്ഷയ് കുമാര് മോചിപ്പിച്ചെടുത്തു എന്ന രീതിയിലുള്ള വാര്ത്തകള് സോഷ്യല് മീഡിയയില് ശ്രദ്ധ നേടുകയാണ്.
ബാങ്ക് ഓഫ് ബറോഡയില് നിന്നുമെടുത്ത 56 കോടി രൂപ വായ്പ തിരിച്ചടക്കാന് കഴിയാത്തതിനെ തുടര്ന്ന് സണ്ണി ഡിയോളിന്റെ മുംബൈ ജുഹുവിലെ ബംഗ്ലാവ് ലേലത്തിന് വയ്ക്കാന് ബാങ്ക് നോട്ടീസ് പ്രസിദ്ധീകരിച്ചിരുന്നു. എന്നാല് പിന്നീട് ചില സാങ്കേതിക കാരണങ്ങളാല് തിങ്കളാഴ്ച നോട്ടീസ് പിന്വലിക്കുകയും ചെയ്തു.
ഇതിനു പിന്നാലെയാണ് അക്ഷയ് കുമാര് രക്ഷകനായി എത്തി സണ്ണിയുടെ കടം വീട്ടിയെന്ന രീതിയിലുള്ള വാര്ത്തകള് പ്രചരിച്ചത്. അക്ഷയ് ഏകദേശം 30-40 കോടി രൂപ സണ്ണിയ്ക്ക് വാഗ്ദാനം ചെയ്തു എന്നായിരുന്നു റിപ്പോര്ട്ട്. എന്നാല് ആ വാര്ത്ത വാസ്തവ വിരുദ്ധമാണെന്ന് വ്യക്തമാക്കിയിരിക്കുകയാണ് അക്ഷയ് കുമാറിന്റെ വക്താക്കള്.
”അത്തരത്തിലുള്ള വാദങ്ങളെല്ലാം തീര്ത്തും വാസ്തവ വിരുദ്ധമാണ്” എന്ന് അക്ഷയുടെ വക്താക്കള് ഹിന്ദുസ്ഥാന് ടൈംസിനോട് വ്യക്തമാക്കി. ഞായറാഴ്ച്ച ബാങ്ക് സണ്ണിയ്ക്ക് അയച്ച നോട്ടീസ് പ്രകാരം കടം 2022 ഡിസംബര് 26 മുതലുള്ളത്.
നോട്ടീസ് പ്രകാരം 55.99 കോടി രൂപയും അതിന്റെ പലിശയും ഈടാക്കുന്നതിനായി സണ്ണിയുടെ ഗാന്ധിഗ്രാം റോഡിലുള്ള സണ്ണിവില്ല ബംഗ്ലാവ് ലേലത്തിനു വയ്ക്കുന്നു എന്നായിരുന്നു നോട്ടീസില് ഉണ്ടായിരുന്നത്. എന്നാല് ബാങ്കിന്റെ അറിയിപ്പ് വന്ന് ഒരു ദിവസത്തിനു ശേഷം, ചില സാങ്കേതിക കാരണങ്ങളാല് നോട്ടീസ് പിന്വലിക്കുകയും ചെയ്തിരുന്നു.