ലോകത്ത് ഏറ്റവും കൂടുതല്‍ ഡിസ്‌ലൈക്കുകള്‍ വാരിക്കൂട്ടിയ രണ്ടാമത്തെ യൂട്യൂബ് വീഡിയോ ആയിരിക്കുകയാണ് “സഡക് 2” ചിത്രത്തിന്റെ ട്രെയ്‌ലര്‍. ചിത്രത്തിനെതിരായുള്ള ഡിസ്‌ലൈക്ക് കാമ്പയിന്‍ സംവിധായകന്‍ മഹേഷ് ഭട്ടിനെ ദേഷ്യത്തിലാക്കിയിരിക്കുകയാണ്. സംവിധായകന്‍ ദേഷ്യത്തില്‍ സംസാരിക്കുന്ന വീഡിയോയാണ് ട്വിറ്ററില്‍ ട്രെന്‍ഡിംഗാവുന്നത്.
മഹേഷ് ഭട്ടിനൊപ്പം ഭാര്യ സോണി റസ്ദാന്‍ മക്കളായ പൂജ ഭട്ട്, ആലിയ ഭട്ട് എന്നിവരെയും വീഡിയോയില്‍ കാണാം. “”സഡക് 2വിന് ഒരു കോടി ഡിസ്‌ലൈക്ക് ലഭിച്ചപ്പോള്‍ മഹേഷ് ഭട്ട് ഭ്രാന്തനായി, ഈ അവസ്ഥ കണ്ട് ആര്‍ക്കൊക്കെ സന്തോഷം തോന്നുന്നു”” എന്ന ക്യാപ്ഷനോടെയാണ് ഈ വീഡിയോ പങ്കുവെച്ചിരിക്കുന്നത്.
എന്നാല്‍ ഈ വീഡിയോ വ്യാജമാണ്. സഡക് 2 ട്രെയ്‌ലറുമായി ഇതിന് ഒരു ബന്ധവുമില്ല. കഴിഞ്ഞ വര്‍ഷം ഡിസംബറിലുള്ള വീഡിയോയാണിത്. വിഷാദരോഗത്തെ കുറിച്ചുള്ള ചോദ്യത്തിന് ഉത്തരം നല്‍കുമ്പോള്‍ മഹേഷ് ഭട്ടിന് ദേഷ്യം വന്ന ഭാഗമാണിത്. ട്രെയ്‌ലര്‍ റിലീസ് ചെയ്തത് ഈ വര്‍ഷം ഓഗസ്റ്റ് 11-നാണ്.
ആറ് ദശലക്ഷത്തിലധികം പേരാണ് സഡക് 2 ട്രെയ്‌ലര്‍ കണ്ടിരിക്കുന്നത്. 11 ദശലക്ഷത്തിലധികം ഡിസ്‌ലൈക്കുകളാണ് ട്രെയ്‌ലറിന് ലഭിച്ചിരിക്കുന്നത്. സുശാന്ത് സിംഗ് രാജ്പുത്തിന്റെ മരണത്തോടെയാണ് സ്വജനപക്ഷപാതത്തിനെതിരെ വിവാദങ്ങള്‍ ഉയരുന്നത്.