ഫിഫ വേള്ഡ് കപ്പ് ഫൈനലില് ട്രോഫി അനാവരണം ചെയ്യാനെത്തിയ ദീപിക പദുക്കോണിനും അഭിന്ദന പ്രവാഹം. കഴിഞ്ഞ കുറച്ച് ദിവസങ്ങളായി ദീപിക പദുക്കോണ് വിവാദത്തിലായിരുന്നു. ‘പത്താന്’ ചിത്രത്തിലെ ‘ബേശരം രംഗ്’ എന്ന ഗാനത്തില് കാവി നിറത്തിലുള്ള ബിക്കിനി ധരിച്ചെന്ന് ആരോപിച്ചായിരുന്നു ദീപികയ്ക്കെതിരെ വിമര്ശനം ഉയര്ന്നത്.
കടുത്ത സൈബര് ആക്രമണങ്ങള് ദീപികയ്ക്ക് നേരെ എത്തിയിരുന്നു. ഹിന്ദു സംഘടനകള് ദീപികയുടെയും ഷാരൂഖിന്റെയും ചിത്രങ്ങള് കത്തിക്കുക വരെ ചെയ്തിരുന്നു. എന്നാല് ഫിഫ വേള്ഡ് കപ്പ് ഫൈനലില് ട്രോഫി അനാവരണം ചെയ്യാന് ദീപിക എത്തിയപ്പോള്, അത് ഓരോ ഇന്ത്യക്കാരനും അഭിമാന നിമിഷമായി മാറി.
അര്ജന്റീനയും ഫ്രാന്സും തമ്മിലുള്ള ഫൈനല് മത്സരത്തിന് തൊട്ടു മുമ്പാണ് ദീപിക പദുക്കോണും കാസില്ലസും ചേര്ന്ന് ലോകകപ്പ് ട്രോഫി വേദിയില് അനാവരണം ചെയ്തത്. ലോകം മുഴുവന് ഉറ്റുനോക്കിയ വേദിയിലെ ഇന്ത്യന് സാന്നിധ്യമായ താരത്തിന് എങ്ങും അഭിനന്ദന പ്രവാഹമാണ്.
ദീപികയെ അഭിനന്ദിച്ചു കൊണ്ടുള്ള പോസ്റ്റുകളാണ് ഇപ്പോള് സോഷ്യല് മീഡിയയില് നിറയുന്നത്. ”ഇതാണ് സ്ത്രീ, ഈയിടെയായി രാജ്യം ദിവസവും ശല്യപ്പെടുത്തുകയും ദുരുപയോഗം ചെയ്യപ്പെടുകയും ചെയ്തവര്. ഇന്ത്യക്ക് അഭിമാനമായി മാറിയവര്, വെറുപ്പിന്റെ നടുവില് തലയുയര്ത്തി നില്ക്കുന്ന ദീപിക.”
”അവിടെ ആരും ബിക്കിനിയുടെ നിറം നോക്കിയില്ല, ഇന്ത്യയെ ലോകം അറിയുന്നത് ദീപിക പദുകോണിലൂടെയും ഷാരൂഖ് ഖാനിലൂടെയുമാണ്, ദീപിക ഇന്ത്യയുടെ മകള്, വിമര്ശകര്ക്കുള്ള കടുത്ത മറുപടി” എന്നാണ് സോഷ്യല് മീഡിയയില് ദീപികയെ അഭിന്ദിച്ചു കൊണ്ടുള്ള ചില പോസ്റ്റുകള്.