ബോളിവുഡ് സൂപ്പര്‍താരം സല്‍മാന്‍ ഖാനെ മൈന്‍ഡ് ചെയ്യാതെ നടന്നു നീങ്ങുന്ന ഫുട്‌ബോള്‍ താരം ക്രിസ്റ്റ്യാനോ റൊണാള്‍ഡോയുടെ ദൃശ്യങ്ങളാണ് ഇപ്പോള്‍ വൈറലാകുന്നത്. റിയാദില്‍ നടന്ന ബോക്‌സിങ് മത്സരം കാണാനാണ് ഇരുതാരങ്ങളും എത്തിയത്.
എന്നാല്‍ വേദിക്കരികെ നില്‍ക്കുന്ന സല്‍മാന്‍ ഖാനെ പരിഗണിക്കുകയോ തിരിഞ്ഞു നോക്കുകയോ പോലും ചെയ്യാതെ ക്രിസ്റ്റ്യാനോ കടന്നുപോകുന്നത് ദൃശ്യങ്ങളില്‍ വ്യക്തമാണ്. ഇതോടെ സല്‍മാന്‍ ഖാനെതിരെ പരിഹാസവും ക്രിസ്റ്റ്യാനോയ്ക്കെതിരെ വിമര്‍ശനവും ഒരുപോലെ കടുക്കുകയാണ്.
സല്‍മാന്‍ ഖാനെ ക്രിസ്റ്റ്യാനോയ്ക്ക് അറിയില്ലെന്ന് ഒരു വിഭാഗം പരിഹസിക്കുമ്പോള്‍ മറ്റൊരു വിഭാഗം അദ്ദേഹത്തെ തിരിച്ചറിയാനായില്ല എന്നാണ് വാദിക്കുന്നത്. എന്നാല്‍, പോര്‍ച്ചുഗീസ് ഇതിഹാസത്തിന് അഹങ്കാരമാണെന്ന തരത്തിലും കുറ്റപ്പെടുത്തല്‍ നടക്കുന്നുണ്ട്.
എന്നാല്‍ ദൃശ്യങ്ങളില്‍ കാണുന്നതല്ല സത്യം എന്നു പറഞ്ഞു കൊണ്ടുള്ള ചിത്രങ്ങളും പുറത്തുവരുന്നുണ്ട്. ക്രിസ്റ്റ്യാനോയ്ക്കും പങ്കാളി ജോര്‍ജിന റോഡ്രിഗസിനുമൊപ്പം ഇരിക്കുന്ന സല്‍മാന്‍ ഖാന്റെ ചിത്രങ്ങളും ശ്രദ്ധ നേടുന്നുണ്ട്. ചടങ്ങിനിടെ സല്‍മാന്‍ ഖാനും ക്രിസ്റ്റ്യാനോയും സംസാരിക്കുന്ന ചിത്രങ്ങളും പുറത്തുവന്നിട്ടുണ്ട്.