ലോകത്തിലെ ഏറ്റവും സമ്പന്നരില്‍ ഒരാളും മൈക്രോസോഫ്റ്റ് മേധാവിയുമായ ബില്‍ഗേറ്റ്‌സിന്റെ ഈ വര്‍ഷത്തെ പ്രചോദനം നല്‍കിയ കാര്യങ്ങളുടെ പട്ടികയില്‍ ഒരു ബോളിവുഡ് ചിത്രവും.
ഈ വര്‍ഷം പൂര്‍ത്തിയാകാന്‍ ഏതാനും ദിവസങ്ങള്‍ മാത്രം ബാക്കിനില്‍ക്കെയാണ് വര്‍ഷത്തെ നിര്‍ണായക സംഭവങ്ങള്‍ മാത്രം കോര്‍ത്തിണക്കി ബില്‍ഗേറ്റ്‌സ് ട്വീറ്റ് ഇട്ടത്. അക്ഷയ്കുമാര്‍, ഭൂമി പട്‌നേക്കര്‍ എന്നിവര്‍ കേന്ദ്ര കഥാപാത്രങ്ങളായി അഭിനയിച്ച ടോയ്‌ലെറ്റ്: ഏക് പ്രേം കഥയും ഈ വര്‍ഷത്തെ പ്രചോദനം നല്‍കിയ സംഭവങ്ങളുടെ കൂട്ടത്തില്‍ ബില്‍ഗേറ്റ്‌സ് ചേര്‍ത്തിട്ടുണ്ട്. അടിസ്ഥാന സൗകര്യത്തില്‍ ഇന്ത്യ നേരിടുന്ന വെല്ലുവിളിയാണ് ചിത്രത്തിലൂടെ കാണിക്കുന്നതെന്ന് ബില്‍ഗേറ്റ്‌സ് ട്വിറ്ററിലൂടെ വ്യക്തമാക്കി.
ഈ വര്‍ഷം കടുപ്പമേറിയതായിരുന്നുവെന്നും എങ്കിലും ചില പ്രതീക്ഷകള്‍ ബാക്കിവെച്ചെന്നും ബില്‍ഗേറ്റ്‌സ് ഇട്ട ട്വീറ്റ് പരമ്പരയില്‍ പറയുന്നു. മൊത്തം ഏഴ് ട്വീറ്റാണ് ഇതുമായി ബന്ധപ്പെട്ട് ബില്‍ഗേറ്റ്‌സ് പോസ്റ്റ് ചെയ്തത്.
കഴിഞ്ഞ ഓഗസ്റ്റില്‍ പുറത്തിറങ്ങിയ ചിത്രത്തില്‍ ഇന്ത്യന്‍ ഗ്രാമങ്ങളിലെ പ്രാഥമിക സൗകര്യങ്ങക്കുറവിന്റെ നേര്‍ചിത്രമാണ് കാണിക്കുന്നത്.