‘വാര്‍ 2’ ടീസറിന് നേരെ വിമര്‍ശനങ്ങള്‍ ഉയരുമ്പോഴും ട്രെന്‍ഡിങ് ആയി നായിക കിയാര അദ്വാനി. കഴിഞ്ഞ ദിവസമാണ് ഹൃത്വിക് റോഷന്‍ ചിത്രം വാര്‍ 2വിന്റെ ടീസര്‍ പുറത്തെത്തിയത്. ജൂനിയര്‍ എന്‍ടിആര്‍ ആണ് ചിത്രത്തിലെ മറ്റൊരു കേന്ദ്ര കഥാപാത്രം. ആക്ഷനും ഫൈറ്റും അടക്കം തീപ്പൊരി സീനുകള്‍ അടങ്ങിയ ടീസര്‍ ആണ് പുറത്തുവന്നത്.
എന്നാല്‍ വെറും സെക്കന്‍ഡുകള്‍ മാത്രം പ്രത്യക്ഷപ്പെട്ട കിയാരയുടെ രംഗം ചര്‍ച്ചയാവുകയാണ്. അതീവ ഗ്ലാമറസ് ആയി ബിക്കിനി ലുക്കിലാണ് കിയാര പ്രത്യക്ഷപ്പെടുന്നത്. ഇതാദ്യമായാണ് കിയാര ബിക്കിനി ലുക്കില്‍ അഭിനയിക്കുന്നത്. തന്റെ ആദ്യ ബിക്കിനി ലുക്ക് ആണിതെന്ന് കിയാര സോഷ്യല്‍ മീഡിയില്‍ കുറിച്ചിട്ടുമുണ്ട്.
”ആദ്യ യഷ്‌രാജ് ചിത്രം, ആദ്യ ആക്ഷന് ചിത്രം, ഈ സൂപ്പര്‍ നായകന്മാര്‍ക്കൊപ്പം ആദ്യ സിനിമ, അയാന്‍ മുഖര്‍ജിക്കൊപ്പം ആദ്യമായി ഒന്നിക്കുന്നു. പിന്നെ തീര്‍ച്ചയായും എന്റെ ആദ്യ ബിക്കിനി ഷോട്ട്” എന്നാണ് ടീസര്‍ പങ്കുവച്ച് കിയാര കുറിച്ചത്. അതേസമയം, സ്‌പൈ യൂണിവേഴ്‌സില്‍ എത്തുന്ന വാര്‍ 2വിന്റെ ടീസറിന് ട്രോളുകളാണ് ലഭിക്കുന്നത്.
ചിത്രത്തിന്റെ മേക്കിങ്ങിനും വിഎഫ്എക്‌സിനും ആക്ഷന് സീനുകള്‍ക്കും വിമര്‍ശനങ്ങള്‍ ഉയരുന്നുണ്ട്. ഈ സ്‌പൈ യൂണിവേഴ്‌സിന്റെതായി നേരത്തെ പുറത്തിറങ്ങിയ സിനിമകളെ ഓര്‍മിപ്പിക്കുന്ന തരത്തിലുള്ള മേക്കിങ് ആണ് വാറിന്റേതെന്നും ഔട്ട്‌ഡേറ്റഡ് ആയി തോന്നുന്നു എന്നുമാണ് പ്രേക്ഷകരുടെ കമന്റ്.
മൗണ്ടെന്‍ ഡ്യൂ പരസ്യം പോലെയാണ് ടീസര്‍ ഉള്ളതെന്നും അഭിപ്രായങ്ങളുണ്ട്. ആക്ഷന് സീനുകളില്‍ ഗ്രീന്‍ സ്‌ക്രീനുകള്‍ തെളിഞ്ഞ് കാണാമെന്നും സിനിമയിലെങ്കിലും വിഎഫ്എക്‌സ് നന്നായി വരട്ടെയെന്നും കമന്റുകള്‍ വരുന്നുണ്ട്. ഓഗസ്റ്റ് 14ന് ആണ് ചിത്രം റിലീസ് ചെയ്യുന്നത്.
