അക്ഷയ് കുമാറിന് കൈയ്യടിച്ച് സോഷ്യല് മീഡിയ. ഈയിടെ മുംബൈയില് നടന്ന സെല്ഫി പ്രമോഷനിടെ ഒരു ആരാധകന് ബാരിക്കേഡ് കടന്ന താരത്തിന്റെ അടുത്ത് എത്തിയിരുന്നു. തുടര്ന്നുണ്ടായ സംഭവവും അക്ഷയ്യുടെ പ്രതികരണവുമാണ് സോഷ്യല് മീഡിയയില് ചര്ച്ചയായി കൊണ്ടിരിക്കുന്നത്.
‘സെല്ഫി’ സിനിമയുടെ പ്രമോഷനിടെയാണ് ഒരു ആരാധകന് വേദിയില് നില്ക്കുന്ന അക്ഷയ്യുടെ അടുത്തേക്ക് എത്തിയത്. നടന്റെ സുരക്ഷാ സംഘം ഉടന് തന്നെ ആരാധകനെ നിലത്തേക്ക് തള്ളിയിടുകയും മാറിനില്ക്കാന് ആംഗ്യം കാണിക്കുകയും ചെയ്യുകയായിരുന്നു.
ഇത് കണ്ട അക്ഷയ് സെക്യൂരിറ്റിയോട് നിര്ത്താന് ആവശ്യപ്പെടുകയും ആള്ക്കൂട്ടത്തിനിടയിലൂടെ ചെന്ന് ആരാധകനെ കെട്ടിപ്പിടിക്കുകയുമായിരുന്നു. താരം ആരാധകനോട് എന്തൊക്കയോ ചെവിയില് പറയുന്നതും സോഷ്യല് മീഡിയയില് പ്രചരിക്കുന്ന വീഡിയോയില് കാണാം.
തുടര്ന്ന് ആരാധകര്ക്ക് നേരെ കൈവീശി കാണിച്ചു കൊണ്ട് താരം അവിടെ നിന്നും പോവുകയും ചെയ്തു. അക്ഷയ് കുമാറിന്റെ പ്രവൃത്തിക്ക് കൈയ്യടിക്കുകയാണ് സോഷ്യല് മീഡിയ ഇപ്പോള്. അതേസമയം, സെല്ഫി ഫെബ്രുവരി 24ന് ആണ് റിലീസ് ചെയ്യുന്നത്.
മലയാള സിനിമ ‘ഡ്രൈവിംഗ് ലൈസന്സി’ന്റെ ഹിന്ദി റീമേക്കാണ് സെല്ഫി. പൃഥ്വിരാജ് അവതരിപ്പിച്ച കഥാപാത്രത്തെയാണ് അക്ഷയ് കുമാര് സെല്ഫിയില് അവതരിപ്പിക്കുന്നത്. സുരാജ് വെഞ്ഞാറമ്മൂടിന്റെ റോളില് ഇമ്രാന് ഹാഷ്മിയാണ് വേഷമിടുന്നത്.