ടൊവിനോ തോമസും കീര്‍ത്തി സുരേഷും വേഷമിടുന്ന ‘വാശി’ ചിത്രത്തിന്റെ പോസ്റ്റര്‍ കഴിഞ്ഞ ദിവസം പുറത്തു വന്നിരുന്നു. ബോളിവുഡ് താരം അഭിഷേക് ബച്ചനും പോസ്റ്റര്‍ പങ്കുവച്ചിരുന്നു. പോസ്റ്ററിന് ലഭിച്ച കമന്റിന് അഭിഷേക് ബച്ചന്‍ കൊടുത്ത മറുപടിയാണ് ഇപ്പോള്‍ ശ്രദ്ധ നേടുന്നത്.
”മലയാളത്തില്‍ നിന്നും വീണ്ടും മറ്റൊരു ഇന്‍ക്രെഡിബിള്‍ സിനിമ” എന്ന ക്യാപ്ഷനോടെയാണ് അഭിഷേക് പോസ്റ്റ് ഷെയര്‍ ചെയ്തത്. ”സഹോദരാ, എന്നെങ്കിലും ബോളിവുഡും ഒരു ഇന്‍ക്രെഡിബിള്‍ സിനിമ ചെയ്യണം” എന്നായിരുന്നു സംവിധായകനായ കമാല്‍ ആര്‍. ഖാന്‍ അഭിഷേകിന്റെ ട്വീറ്റ് റീട്വീറ്റ് ചെയ്ത് കുറിച്ചത്.
‘ഞങ്ങള്‍ ശ്രമിക്കാം, നിങ്ങളുടെ ‘ദേശ്‌ദ്രോഹി’ ഉണ്ടല്ലോ,’ എന്നായിരുന്നു അഭിഷേകിന്റെ മറുപടി. കമാല്‍ ആര്‍. ഖാന്‍ സംവിധാനം ചെയ്ത് നായകനായി അഭിനയിച്ച ചിത്രമാണ് ദേശ്‌ദ്രോഹി. 2008ല്‍ ആണ് ചിത്രം റിലീസ് ചെയ്തത്. അഭിഷേകിന്റെ മറുപടിക്ക് മറ്റൊരു കമന്റും കമാല്‍ കുറിച്ചിട്ടുണ്ട്.
”നിങ്ങളുടെ മേക്കപ്പ്മാന്റെ ബജറ്റിനെക്കാളും കുറവാണ് എന്റെ സിനിമയുടെ ബജറ്റ്. എനിക്ക് രണ്ടാമതൊരു സിനിമ കൂടി ചെയ്യണമെന്നുണ്ട്. പക്ഷേ ബോളിവുഡ് അതിനു അനുവദിക്കുന്നില്ല. ഇല്ലെങ്കില്‍ അത് മറ്റൊരു ബ്ലോക് ബസ്റ്റര്‍ ആകുമായിരുന്നു” എന്നാണ് കമാല്‍ കുറിച്ചത്.
”പരിശ്രമം തുടരൂ, ഒരിക്കല്‍ നിങ്ങള്‍ വിജയിക്കുമെന്നാണ് ഞാന്‍ പ്രതീക്ഷിക്കുന്നത്” എന്നാണ് അഭിഷേക് മറുപടി നല്‍കിയിരിക്കുന്നത്. മോഹന്‍ലാല്‍, മഞ്ജു വാര്യര്‍, എ. ആര്‍. റഹ്‌മാന്‍, തൃഷ, മഹേഷ് ബാബു, സാമന്ത, എന്നീ പ്രമുഖതാരങ്ങളെല്ലാം വാശിയുടെ പോസ്റ്റര്‍ പങ്കുവെച്ചിരുന്നു.