ഫെയറി ടെയ്ലുകളെ അനുസ്മരിപ്പിക്കുന്നതാണ് പ്രിന്‍സ് ഹാരിയുടെയും ഭാവി പങ്കാളി മേഘന്‍ മര്‍ക്കിളിന്റെയും വിവാഹ നിശ്ചയ ഫോട്ടോകള്‍. ഇന്നലെ പുറത്തുവിട്ട ഫോട്ടോകള്‍ക്ക് അഭൂതപൂര്‍വമായ സ്വീകരണമാണ് ലോകത്തിന്റെ വിവിധ ഭാഗങ്ങളില്‍ നിന്ന് ലഭിച്ചത്.
വിരാട് കോഹ്ലിയുടെയും അനുഷ്‌ക ശര്‍മയുടെയും വിവാഹ ഫോട്ടോകള്‍ ഇന്ത്യയില്‍ വൈറലായതിന് സമാനം തന്നെയാണ് ബ്രിട്ടനിലും നിരവധി മറ്റ് രാജ്യങ്ങളിലും ഹാരിയുടെയും കാമുകിയുടെയും ഫോട്ടോകള്‍ വൈറലായിക്കൊണ്ടിരിക്കുന്നത്.
കെന്‍സിംഗ്ടണ്‍ പാലസ് ഔദ്യോഗികമായാണ് രണ്ട് ഫോട്ടോകള്‍ പുറത്തുവിട്ടത്. ആരാധകര്‍ ഇപ്പോഴും അതിനെക്കുറിച്ച് സംസാരിച്ചുകൊണ്ടേയിരിക്കുന്നു. ലോകപ്രശസ്ത ഫോട്ടോഗ്രഫറായ അലക്സി ലബോമിര്‍സ്‌കിയാണ് ഹാരിയുടെയും കാമുകിയുടെയും ഫോട്ടോ എടുത്തിരിക്കുന്നത്.
ഇന്‍സ്റ്റഗ്രാമിലും ട്വിറ്ററിലുമാണ് ഫോട്ടോകള്‍ ആരാധകരുടെ ഹൃദയം കീഴടക്കി മുന്നേറുന്നത്. ട്വിറ്ററില്‍ ഒരു ഫോട്ടോയ്ക്ക് ഒരു മണിക്കൂറിനുള്ളില്‍ ലഭിച്ചത് 9 ലക്ഷത്തോളം ലൈക്കുകളാണ്. ഇന്‍സ്റ്റഗ്രാമില്‍ ലഭിച്ചത് ഒരു മണിക്കൂറിനുള്ളില്‍ രണ്ട് ലക്ഷം ലൈക്കുകളും. വിന്‍ഡ്സര്‍ കാസിലില്‍ വെച്ചാണ് ഫോട്ടോകള്‍ എടുത്തിരിക്കുന്നത്.
ലൈക്കുകളും കമന്റുകളും പ്രവഹിക്കുകയാണ് ഇപ്പോഴും. കുറ്റപ്പെടുത്തലുകളില്ലാതെ ഇരുവര്‍ക്കും എല്ലാവരും നേരുന്നത് മംഗളാശംസകളാണ്.