ഗുജറാത്ത്, ഹിമാചല്പ്രദേശ് നിയമസഭാ തെരഞ്ഞെടുപ്പുകളുടെ ഫലം പുറത്തുവന്ന ദിവസം കോണ്ഗ്രസ് അധ്യക്ഷന് രാഹുല് ഗാന്ധി സിനിമ കാണാന് പോയെന്ന് “എക്സ്ക്ലൂസീവ്” വാര്ത്തയുമായി ടൈംസ് നൗ ന്യൂസ് ചാനല്. വാര്ത്ത നല്കിയതിന് പുറമെ ഒരു മണിക്കൂറോളം “ആര് യൂ സീരിയസ്” രാഹുല് ഗാന്ധി എന്ന ചോദ്യത്തോടെ ചാനല് ചര്ച്ചയും സംഘടിപ്പിച്ചു.
സ്റ്റാര് വാര്സ്: ദ് ലാസ്റ്റ് ജേഡി എന്ന ഇംഗ്ലീഷ് ചിത്രം കാണാനാണ് രാഹുല് ഗാന്ധി പോയത്. ബിജെപി നേതൃത്വം അവരുടെ തെരഞ്ഞെടുപ്പ് ഫലം അവലോകനം ചെയ്യുമ്പോള് കോണ്ഗ്രസ് അധ്യക്ഷന് സിനിമയ്ക്ക് പോയതാണ് ചാനലിന്റെ എഡിറ്റര്മാരില് ഒരാളായ നൈവിക കുമാറിനെ “ചൊടിപ്പിച്ചത്”.
ടൈംസ് നൗവിന്റെ ഈ വാര്ത്തയോടും ചര്ച്ചയോടും വളരെ രൂക്ഷമായിട്ടാണ് സോഷ്യല് മീഡിയ പ്രതികരിച്ചത്.