ബാങ്കിംഗ് നയങ്ങളിലെ മാറ്റത്തെ കുറിച്ച് പറയുന്ന ഒരു പുതിയ വീഡിയോ സോഷ്യല് മീഡിയയില് വൈറലായിരിക്കുകയാണ്. ജനുവരി 20 ഓടെ രാജ്യത്തെ ബാങ്കുകള് സൗജന്യ സേവനങ്ങളെല്ലാം അവസാനിപ്പിക്കുമെന്നാണ് വീഡിയോയില് പറയുന്നത്. സെല്ഫ് ചെക്കുകള്ക്കും ഇന്റര്നെറ്റ് ബാങ്കിംഗിനും മറ്റ് സേവനങ്ങള്ക്കും ഈടാക്കുന്ന അധിക ചാര്ജുകളെക്കുറിച്ചും ഈ വീഡിയോയിലുണ്ട്.
എന്നാല് ഈ വീഡിയോ പുതിയതല്ല. 2018 ഡിസംബര് 20-ന് ഒരു ഫെയ്സ്ബുക്ക് പേജില് ഇത് അപ്ലോഡ് ചെയ്തിരുന്നതായി. ദ മെസ്സേജ് എന്ന ചാനലില് ഇതുസംബന്ധിച്ച് യൂട്യൂബ് വീഡിയോയുമുള്ളതായി കാണാന് കഴിയും അത് 2018 ജനുവരി 7 നാണ് അപ്ലോഡ് ചെയ്തിരിക്കുന്നത്.
മുന് ധനകാര്യ സെക്രട്ടറി രാജീവ് കുമാര് 2018 ജനുവരി 10 ലെ തന്റെ ട്വീറ്റില്, ഈ വീഡിയോയുടെ സത്യാവസ്ഥയെക്കുറിച്ച് സംസാരിക്കുന്നുണ്ട്. ജനുവരി 20 മുതല് സൗജന്യ സേവനങ്ങള് നിര്ത്തലാക്കാന് ബാങ്കുകള് നിര്ദ്ദേശിച്ചിട്ടില്ല. ഇത് തികച്ചും കിംവദന്തിയാണ്, പൂര്ണ്ണമായും അവഗണിക്കുക, അദ്ദേഹം തന്റെ ട്വീറ്റില് പറഞ്ഞു.
ഇന്ത്യന് ബാങ്ക്സ് അസോസിയേഷന്റെ ചീഫ് എക്സിക്യൂട്ടീവിന്റെ പത്രക്കുറിപ്പിനൊപ്പം അദ്ദേഹം മറ്റൊരു ട്വീറ്റും ഈ വിഷയത്തില് പങ്കുവെച്ചിട്ടുണ്ട്. പൊതുജനങ്ങള് ജാഗ്രത പാലിക്കണമെന്നും ഇത്തരം സന്ദേശങ്ങളില് തെറ്റിദ്ധരിക്കരുതെന്നും ഇന്ത്യന് ബാങ്ക്സ് അസോസിയേഷനും വ്യക്തമാക്കിയിരുന്നു.