മൂന്നാം മോദി സര്ക്കാരിന്റെ ആദ്യ ബജറ്റ് പ്രഖ്യാപനം കഴിഞ്ഞ് ഒരു മണിക്കൂറിനുള്ളില് സ്വര്ണത്തിന്റെ വിലയില് വന് കുറവ് രേഖപ്പെടുത്തി. കേന്ദ്ര ബജറ്റില് സ്വര്ണത്തിന്റെ അടിസ്ഥാന തീരുവ കുറച്ചിരുന്നു. ഇതിന് പിന്നാലെയാണ് സ്വര്ണത്തിന്റെ വില കുറഞ്ഞത്. ബജറ്റിന് മുന്പ് 53,960 രൂപയായിരുന്നു ഒരു പവന് സ്വര്ണത്തിന്റെ വില.
ബജറ്റ് പ്രഖ്യാപനത്തിന് ഒരു മണിക്കൂര് ശേഷം സ്വര്ണവിലയില് 2000 രൂപയുടെ കുറവാണ് രേഖപ്പെടുത്തിയിരിക്കുന്നത്. ഇതോടെ സ്വര്ണം പവന് 51,960രൂപയായി കുറഞ്ഞു. ഗ്രാമിന് 250 രൂപയുടെ കുറവ് സംഭവിച്ചിട്ടുണ്ട്. ഗ്രാമിന് 6745 രൂപയായിരുന്നത് 250 രൂപ കുറഞ്ഞ് 6495 രൂപയായി. ഇറക്കുമതി തീരുവ കുറച്ചതാണ് വില ഇടിഞ്ഞതിന് കാരണം.
ബജറ്റില് സ്വര്ണത്തിന്റെ അടിസ്ഥാന ഇറക്കുമതി തീരുവ 10 ശതമാനത്തില് നിന്നും 6 ശതമാനമാക്കി കുറയ്ക്കുകയായിരുന്നു. കഴിഞ്ഞ ആഴ്ചയില് രാജ്യത്ത് സ്വര്ണത്തിന് റെക്കോര്ഡ് വില രേഖപ്പെടുത്തിയിരുന്നു. ബുധനാഴ്ച 55,000 രൂപയായിരുന്നു ഒരു പവന് സ്വര്ണത്തിന്റെ വില. കേന്ദ്ര ധനമന്ത്രി നിര്മ്മല സീതാരാമന് കസ്റ്റംസ് തീരുവ കുറച്ചതിന് പിന്നാലെയാണ് വിലയില് കാര്യമായ ഇടിവുണ്ടായത്.