സർക്കാരിന്റെ വരുമാനത്തിൽ ഉണ്ടായിരിക്കുന്ന ഭീമമായ ഇടിവ് കേന്ദ്ര ബജറ്റിനെ എങ്ങനെ സ്വാധീനിക്കും എന്നാണ് സാമ്പത്തിക വിദഗ്ധര്‍ ഉറ്റുനോക്കുന്നത്. നടപ്പ് സാമ്പത്തിക വർഷത്തിൽ പ്രതീക്ഷിച്ചിരുന്ന വരുമാനത്തേക്കാൾ വളരെ താഴെയാണ് യഥാർത്ഥ വരുമാനമെന്ന് കണക്കുകൾ വ്യക്തമാക്കുന്നു. 2019 -20ൽ 24.61 ലക്ഷം കോടി രൂപയാണ് കേന്ദ്ര സർക്കാർ ലക്ഷ്യമിട്ടിരിക്കുന്നത്. എന്നാൽ ബജറ്റ്സ് ആൻഡ് കൺട്രോളർ ജനറൽ ഓഫ് അകൗണ്ട്സിന്റെ പുതിയ കണക്കുകൾ പ്രകാരം നവംബർ മാസം വരെയുള്ള വരുമാനം 11.65 ലക്ഷം കോടി രൂപ മാത്രമാണ്.
2018 -19 സാമ്പത്തിക വർഷത്തെ യഥാർത്ഥ വരുമാന കണക്കും ഇപ്പോൾ പുറത്ത് വിട്ടിട്ടുണ്ട്. കഴിഞ്ഞ സാമ്പത്തിക വർഷത്തിൽ ഗവണ്മെന്റ് ലക്ഷ്യമിട്ടിരുന്നത് 22.17 ലക്ഷം കോടി രൂപയായിരുന്നെങ്കിൽ യഥാർത്ഥത്തിൽ ലഭിച്ചത് 20 .8 ലക്ഷം കോയി രൂപയാണ്. അതായത് 1.91 ലക്ഷം കോടി രൂപയുടെ കുറവ്. ഈ കാരിഓവർ നിലനിൽക്കുമ്പോഴാണ് നടപ്പ് സാമ്പത്തിക വർഷത്തെ വരുമാനത്തിൽ ഗുരുതരമായ ചോർച്ച ഉണ്ടായിരിയ്ക്കുന്നത്.
2009 -10 വർഷം മുതലുള്ള കണക്കുകൾ പരിഗണിക്കുമ്പോൾ വരുമാന ചോർച്ച തുലോം കുറവായിരുന്നുവെന്ന് കാണാം. 2015 -16 മുതൽ തുടർച്ചയായ മൂന്ന് വർഷങ്ങളിൽ വരുമാനം പ്രതീക്ഷിച്ചിരുന്നതിനേക്കാൾ കൂടുതലായിരുന്നു. എന്നാൽ കഴിഞ്ഞ സാമ്പത്തിക വർഷം മുതൽക്കാണ് ഇതിന് വലിയ തിരിച്ചടി നേരിട്ടത്. നടപ്പ് വർഷം അവസാനിക്കുമ്പോൾ യഥാർത്ഥ വരുമാനം പ്രതീക്ഷിച്ചതിനേക്കാൾ അഞ്ചു ലക്ഷം കൂടിയെങ്കിലും കുറവായിരിക്കുമെന്നാണ് വിലയിരുത്തുന്നത്.