ബന്ധു- ആശ്രിത നിയമനങ്ങള് കേരളത്തിലും ദേശീയ രാഷ്ട്രീയത്തിലു പലകുറി ചര്ച്ചയായിട്ടുണ്ട്. ഗവണ്മെന്റ് സര്വ്വീസുകളില് തന്റെ ബന്ധുക്കളെ തിരുകി കയറ്റുന്ന സമീപനം രാഷ്ട്രീയക്കാരെ പലപ്പോഴും അഴിമതിക്കാരാക്കി മാറ്റിയ ചരിത്രവും ഉണ്ട്. കുടുംബ വാഴ്ചയും രാഷ്ട്രീയ കളരിയില് എതിരാളികള് ആയുധമാക്കി പലരേയും വീഴ്ത്തിയിട്ടുണ്ട്. നരേന്ദ്ര മോദി പ്രധാനമന്ത്രിയായപ്പോഴും ആകാനുള്ള തയ്യാറെടുപ്പിലും കോണ്ഗ്രസിനെ വിറപ്പിക്കാന് ഉപയോഗിച്ച പ്രധാന ആയുധം നെഹ്റു കുടുംബത്തിന്റെ രാഷ്ട്രീയ വാഴ്ചയായിരുന്നു. തലമുറ കൈമാറി വരുന്ന രാഷ്ട്രീയ രീതിയെ പരിഹസിച്ചും വേട്ടയാടിയുമാണ് നരേന്ദ്ര മോദി കോണ്ഗ്രസ് മുക്ത ഭാരതത്തിനായി പ്രവര്ത്തിച്ചത്. ഡൈനാസ്റ്റി പൊളിറ്റിക്സിനെ ആക്രമിക്കുന്ന ബിജെപിക്കാര് പക്ഷേ രാഷ്ട്രീയത്തില് അതില് നിന്ന് മുക്തരൊന്നുമല്ലായിരുന്നെങ്കിലും അണികളെ വിശ്വസിപ്പിക്കാന് വാട്സാപ്പ് യൂണിവേഴ്സിറ്റിയിലൂടെ തങ്ങള് ഡൈനാസ്റ്റി പൊളിറ്റിക്സിനെ എതിര്ക്കുന്നവരാണെന്ന ഇമേജ് ഉണ്ടാക്കിയെടുത്തു. പക്ഷേ ബിജെപി നേതാക്കള് ഡൈനാസ്റ്റി പൊളിറ്റിക്സിനൊപ്പം വളര്ത്തിയെടുത്ത അതിലും ഭീകരമായ കോര്പ്പറേറ്റ് പൊളിറ്റിക്സ് ഇന്ത്യയുടെ മുഖം തന്നെ മാറ്റിയെടുക്കുന്നത് പലരും കണ്ടില്ലെന്ന് നടിയ്ക്കുകയാണ്.