ടോക്യോ ഒളിമ്പിക്സ് ടെന്നീസില്‍ ലോക ഒന്നാം നമ്പര്‍ സെര്‍ബിയയുടെ നൊവാക് ജോക്കോവിച്ചിന്റെ മെഡല്‍ മോഹം പൊലിഞ്ഞു. പുരുഷ വിഭാഗം വെങ്കല മെഡല്‍ പോരാട്ടത്തില്‍ സ്പെയ്നിന്റെ പാബ്ലൊ കരേനൊ ബുസ്റ്റ ജോക്കോയെ അട്ടിമറിച്ചു, സ്‌കോര്‍: 6-4, 6-7, 6-3.
സെമിയില്‍ അലക്സാണ്ടര്‍ സ്വരേവിനോട് തോറ്റതിന്റെ ക്ഷീണവുമായെത്തിയ ജോക്കോവിച്ചിന് ബുസ്റ്റയോടും പിടിച്ചുനില്‍ക്കാനായില്ല. 32 വിന്നറുകള്‍ തൊടുത്ത ബുസ്റ്റ ജോക്കോവിച്ചിനെ കളിയുടെ സമസ്ത തലങ്ങളിലും കടത്തിവെട്ടി. വെറും 18 വിന്നറുകള്‍ മാത്രമേ ജോക്കോയുടെ റാക്കറ്റില്‍ നിന്ന് പിറന്നുള്ളു.
ജോക്കോവിച്ച് വരുത്തി പിഴവുകളും ബുസ്റ്റയുടെ ജയം അനായാസമാക്കി. മത്സരത്തിനിടെ അരിശം മൂത്ത ജോക്കോവിച്ച് ആളൊഴിഞ്ഞ ഗാലറിയിലേക്ക് റാക്കറ്റ് വലിച്ചെറിയുകയും നെറ്റ് പോസ്റ്റില്‍ റാക്കറ്റുകൊണ്ട് അടിക്കുകയും ചെയ്തു. ആറാം മാച്ച് പോയിന്റ് മുതലാക്കിയാണ് ബുസ്റ്റ ഒളിമ്പിക്സ് മെഡല്‍ ഉറപ്പിച്ചത്.