പന്തു കൊണ്ട് വിസ്മയ പ്രകടനം കാഴ്ച്ച വെച്ച മലയാളി പയ്യന്‍ ഇപ്പോള്‍ ലോകോത്തര താരങ്ങളുടെയും ശ്രദ്ധ ആകര്‍ഷിച്ചിരിക്കുകയാണ്. കര്‍ണാടക അതിര്‍ത്തി പ്രദേശമായ കാസര്‍ഗോഡ് ജില്ലയിലെ പരപ്പ ദേലംപാടി സ്വദേശി 13 വയസ്സുളള മഹ്റൂഫാണ് ഇപ്പോള്‍ ഫുട്ബോള്‍ ലോകത്ത് ചര്‍ച്ചയായി മാറിയിരിക്കുന്നത്.
ചെളിവെള്ളം നിറഞ്ഞ മൈതാനത്ത് കൂട്ടുകാര്‍ക്കൊപ്പം ഫുട്ബോള്‍ കളിക്കുന്നതിന്റെ 26 സെക്കന്റ് ദൈര്‍ഘ്യമുള്ള വീഡിയോയാണ് മഹ്റൂഫിന് താരപദവി നേടിക്കൊടുത്തത്. എതിരാളികളെ തന്ത്രപരമായി വെട്ടിച്ച് മികച്ച പാസ് നല്‍കി ഗോള്‍വല ചലിപ്പിക്കുന്ന മഹ്റൂഫിന്റെ പ്രകടനമാണ് വീഡിയോയിലുള്ളത്. ഈ വീഡിയോ നിമിഷനേരം കൊണ്ട് വൈറലാകുകയും ചെയ്തിരുന്നു.
ഇതോടെ മഹ്റൂഫിനെ അഭിനന്ദിച്ച് ലോകോത്തര താരങ്ങള്‍ വരെ രംഗത്തെത്തി. മുന്‍ ബ്ലാസ്റ്റേഴ്സ് താരം ഇയാന്‍ എഡ്വേഡ് ഹ്യൂം, ഹോളണ്ട് വാല്‍വിജിക് ക്ലബ് താരം ഹാന്‍സ് മുള്‍ഡര്‍ എന്നിവരാണ് വീഡിയോ കണ്ട ഉടന്‍ മഹ്റൂഫിനെ കുറിച്ച് കൂടുതല്‍ അറിയാനും അഭിനന്ദിക്കാനും മുന്നോട്ടു വന്നത്. വീഡിയോ പങ്കുവെച്ച കേരള ബ്ലാസ്റ്റേഴ്സ് എഫ്സിയും മഹ്റൂഫിന് അഭിനന്ദനവുമായി രംഗത്തെത്തി.
മികച്ച കഴിവുള്ള കുട്ടിയാണ് മഹ്റൂഫ് എന്നും കൂടുതല്‍ പരിശീലനം നല്‍കി അത് വളര്‍ത്തിയെടുക്കുന്നതിന് ക്ലബ്ബുകള്‍ മുന്നോട്ടു വരണമെന്നും കേരള ബ്ലാസ്റ്റേഴ്സ് അഭ്യര്‍ത്ഥിച്ചു.