അര്‍ജന്റൈന്‍ സൂപ്പര്‍ താരം ലയണല്‍ മെസിയെ തടയാന്‍ കോച്ച് നല്‍കിയ നിര്‍ദേശത്തെക്കുറിച്ച് വെളിപ്പെടുത്തി ന്യൂകാസില്‍ യുണൈറ്റഡിന്റെ പ്രതിരോധ താരം കൈറന്‍ ട്രിപ്പിയര്‍. സ്പാനിഷ് ക്ലബ്ബായ അത്ലറ്റികോ മാഡ്രിഡില്‍ കളിച്ചു കൊണ്ടിരിക്കുമ്പോള്‍ പരിശീലകനായിരുന്ന ഡീഗോ സിമിയോണി നല്‍കിയ ഉപദേശമാണ് താരം വെളിപ്പെടുത്തിയത്.
‘മെസിയെ തടയാന്‍ ഒരു വഴി മാത്രമേയുള്ളു. നന്നായി പ്രാര്‍ത്ഥിക്കുക. അതു മാത്രമേ നമുക്ക് ചെയ്യാനാകൂ.’ എന്നാണ് അത്ലറ്റികോ മാഡ്രിഡ് കോച്ച് ഡീഗോ സിമിയോണി നല്‍കിയ ഉപദേശം. ഗോളിന് നല്‍കിയ അഭിമുഖത്തിലാണ് ഇംഗ്ലീഷ് പ്രതിരോധ താരം കൂടിയായ ട്രിപ്പിയര്‍ ഇക്കാര്യം പറഞ്ഞത്.
‘മെസിക്ക് എതിരെ കളിക്കുക എന്നത് ഏറ്റവും ബുദ്ധിമുട്ടുള്ള കാര്യമാണ്. തമാശ എന്തെന്നാല്‍ ഞങ്ങളുടെ കോച്ച് ഡീഗോ സിമിയോണിയും അര്‍ജന്റീനക്കാരനാണ്. നന്നായി പ്രാര്‍ത്ഥിക്കുക മാത്രമാണ് മെസിയെ തടയാനുള്ള ഏക വഴിയെന്ന് അദ്ദേഹം എല്ലാ മത്സരങ്ങള്‍ക്കും മുന്നെ പറയുമായിരുന്നു’ ട്രിപ്പിയര്‍ പറഞ്ഞു.
ബാഴ്സലോണയുടെ ഭാഗമായി മെസി കരിയറില്‍ ഇതുവരെ 43 തവണ അത്ലറ്റികോ മാഡ്രിഡിനെതിരെ കളിച്ചിട്ടുണ്ട്. ഇതില്‍ 24 മത്സരങ്ങള്‍ വിജയിക്കുകയും എട്ട് തവണ പരാജയപ്പെടുകയും 11 തവണ സമനില വഴങ്ങുകയും ചെയ്തു. 32 ഗോളുകളും ഒന്‍പത് അസിസ്റ്റുകളുമാണ് മാഡ്രിഡിനെതിരെ ലയണല്‍ മെസി നേടിയത്.
