കൊച്ചി: കേരള ബ്ലാസ്റ്റേഴ്‌സിന്റെ മലയാളി താരങ്ങളായ സികെ വിനീതിനും റിനോ ആന്റോയ്ക്കുമെതിരെ രൂക്ഷവിമര്‍ശവുമായി എഴുത്തുകാരന്‍ എന്‍ എസ് മാധവന്‍. ഗോവയ്‌ക്കെതിരെയുളള മത്സരത്തില്‍ ഗോള്‍ നേടിയ ശേഷം സികെ വിനീതും റിനോ ആന്റോയും പുറത്തെടുത്ത മദ്യപിക്കുന്നവരുടെ ശരീരഭാഷയിലുളള ആഹ്ലാദ പ്രകടനമാണ് എന്‍എസ് മാധവനെ പ്രകോപിപ്പിച്ചിരിക്കുന്നത്.
മുന്‍ കോച്ച് റെനെ മ്യൂലന്സ്റ്റീന് മറുപടിയായിട്ടാണ് സികെ വിനീതിന്റേയും റിനോ ആന്റോയും അത്തരത്തിലൊരു ആഹ്ലാദ പ്രകടനം നടത്തിയത്. മദ്യപിക്കുന്നവരുടെ ശരീര ഭാഷ ഫുട്‌ബോള്‍ കളത്തില്‍ കാണാന്‍ പാടില്ലാത്തതാണെന്നും കളികാണുന്ന കുട്ടികള്‍ക്ക് അത് നല്‍കുന്ന സന്ദേശം അത്ര നല്ലതല്ലെന്നും എന്‍എസ് മാധവന്‍ ചൂണ്ടികാണിക്കുന്നു. എന്‍എസ് മാധവന്റെ ട്വീറ്റ് ഇങ്ങനെ.
“മുന്‍ കോച്ച് മ്യൂലെന്‍സ്റ്റീനിലുള്ള മറുപടി ജിംഗാന്‍ ചത്ത് കളിച്ച് നല്‍കുന്നത് കണ്ടു. റീനോവും വീനിതും പുറത്തെടുത്ത മദ്യപ്പിക്കുന്നവരുടെ ശരീരഭാഷ ഫുട്ബാള്‍ കളത്തില്‍ കാണാന്‍ പാടില്ലാത്തതായിരുന്നു. കളി കാണുന്ന കുട്ടികള്‍ക്ക് അത് നല്‍കുന്ന സന്ദേശം അത്ര നല്ലതല്ല”
ഗോള്‍ നേടിയ ശേഷം വലത്തെ കോര്‍ണര്‍ ഫല്‍ഗിനടുത്തേക്കു പോയ വിനീത് കുഴയുന്ന രീതിയില്‍ നടന്നു. ഓടിയെത്തിയ റിനോ ആന്റോയും വിനീതും കൈകോര്‍ത്ത് കുടിക്കുന്ന രീതിയില്‍ ആംഗ്യം കാണിക്കുകയും ചെയ്തിരുന്നു. ഇതു ചൂണ്ടിക്കാട്ടിയാണ് എന്‍എസ് മാധവന്റെ ട്വീറ്റ്.
നേരത്തെ കേരള ബ്ലാസ്റ്റേഴ്‌സ് താരങ്ങള്‍ക്കെതിരെ മുന്‍ പരിശീലകന്‍ റെനെ മ്യൂലന്സ്റ്റീന് ആഞ്ഞടിച്ചിരുന്നു. ഗോവയോടെ 5-2ന് തോല്‍വി നേരിട്ട മത്സര ദിവസം പുലര്‍ച്ചെ 4 മണിവരെ ജിങ്കാന്‍ മദ്യപാനവുമായി ആഘോഷിക്കുകയായിരുന്നുവെന്നും, കാര്യപ്രാപ്തിയില്ലാത്ത മാനേജ്മെന്റാണ് ബ്ലാസ്റ്റേഴ്സിന്റേത് എന്നുമായിരുന്നു മ്യുലന്‍സ്റ്റീനിന്റെ വിമര്‍ശനം.