ഫ്രാന്‍സിനെതിരെ നടന്ന ക്വാര്‍ട്ടര്‍ ഫൈനല്‍ മത്സരത്തില്‍ നിര്‍ണായക പെനാല്‍റ്റി പാഴാക്കിയതില്‍ പ്രതികരണവുമായി ഇംഗ്ലണ്ട് ക്യാപ്റ്റന്‍ ഹാരി കെയ്ന്‍. തനിക്ക് ഇതുമായി പൊരുത്തപ്പെട്ട് ജീവിക്കേണ്ടി വരുമെന്നാണ് താരം പ്രതികകരിച്ചത്.
‘തീര്‍ച്ചയായും എനിക്ക് ഇതുമായി പൊരുത്തപ്പെട്ട് ജീവിക്കേണ്ടി വരും. പക്ഷേ നമ്മള്‍ ഓരോരുത്തരെയും ഓര്‍ത്ത് അഭിമാനിക്കാന്‍ സാധിക്കും. നമ്മുടെ ടീമിന് ഭാവിയില്‍ നല്ലൊരു സ്ഥാനം ലഭിക്കുമെന്ന് എനിക്ക് അറിയാം’ ഹാരി കെയ്ന്‍ പറഞ്ഞു.
82ാം മിനിറ്റിലാണ് ജയത്തോളം വിലയുള്ള പെനാല്‍റ്റി ഇംഗ്ലീഷ് നായകന്‍ കളഞ്ഞുകുളിച്ചത്. ഫ്രഞ്ച് പ്രതിരോധ താരം തിയോ ഹെര്‍ണാണ്ടസ് മേസണ്‍ മൗണ്ടിനെ അനാവശ്യമായി തള്ളിയിട്ടതിന് വാറിന്റെ സഹായത്തോടെ പെനാല്‍റ്റി ലഭിക്കുകയായിരുന്നു. കിക്കെടുത്ത കെയ്ന്‍ ഗോളിയുടെ വലത്തേക്ക് തൊടുത്ത ഷോട്ട് ബാറിന് മുകളിലൂടെ പുറത്തേയ്ക്ക് പായുകയായിരുന്നു.
ഒന്നിനെതിരെ രണ്ട് ഗോളുകള്‍ക്ക് ഫ്രാന്‍സ് മുന്നിട്ട് നില്‍ക്കവേ സമനില പിടിക്കാന്‍ ഇംഗ്ലണ്ടിന് ലഭിച്ച അവസരമാണ് കെയ്ന്‍ നഷ്ടപ്പെടുത്തിയത്. ഇംഗ്ലണ്ടിന് വേണ്ടി ഏക ഗോള്‍ നേടിയതും ഹാരി കെയ്നാണ്.