സൗദി പ്രോ ലീഗില് അല്-ഷബാബിനെതിരായ അല്-നാസറിന്റെ മത്സരത്തിനിടെ അശ്ലീല ആംഗ്യം കാണിച്ചതിന് ക്രിസ്റ്റ്യാനോ റൊണാള്ഡോയെ സൗദി അറേബ്യന് ഫുട്ബോള് ഫെഡറേഷന് ഒരു മത്സരത്തില് നിന്ന് സസ്പെന്ഡ് ചെയ്തു. ഒപ്പം 30,000 സൗദി റിയാല് പിഴയും ചുമത്തി.
സൗദി പ്രോ ലീഗ് മത്സരത്തില് അല്-ഷബാബിനെ 3-2 ന് പരാജയപ്പെടുത്തിയതില് റൊണാള്ഡോ നിര്ണായക പങ്ക് വഹിച്ചു. എന്നാല് വിജയാഹ്ലാദം പ്രകടിപ്പിക്കവെ സൂപ്പര്താരം ഗ്യാലറിയിലേക്ക് നോക്കി അശ്ലീല ആംഗ്യം കാണിച്ചത് വലിയ വിവാദമായി.
റൊണാള്ഡോയെ പ്രകോപിപ്പിക്കാന് ഷബാബ് ആരാധകര് നടത്തിയ ‘മെസ്സി’ വിളിയാണ് പ്രശ്നങ്ങള്ക്ക് കാരണമെന്നാണ് പുറത്ത് വന്ന് ദൃശ്യങ്ങള് വ്യക്തമാകുന്നത്. മത്സരത്തിലുടനീളം ഗ്യാലറിയില് മെസ്സീ ആരവം മുഴക്കി റൊണാള്ഡോയെ പ്രകോപിപ്പിക്കാന് ആരാധകര് ശ്രമിച്ചിരുന്നു. ഇതാണ് മത്സര ശേഷം ആരാധകരെ നോക്കി കൈ കൊണ്ട് അശ്ലീല ആംഗ്യം കാണിക്കാന് ക്രിസ്റ്റ്യാനോയെ പ്രേരിപ്പിച്ചതെന്നാണ് മാധ്യമങ്ങള് റിപ്പോര്ട്ട് ചെയ്യുന്നത്.
39 കാരനായ റൊണാള്ഡോ മുമ്പും സമാനമായ വിവാദങ്ങളില് ഉള്പ്പെട്ടിട്ടുണ്ട്. കഴിഞ്ഞ വര്ഷം ഏപ്രിലില്, അല് ഹിലാലിനെതിരായ പരാജയത്തിന് ശേഷം ഡഗൗട്ടിലേക്കുള്ള യാത്രയ്ക്കിടെ ജനനേന്ദ്രിയത്തില് പിടിക്കുന്ന തരത്തില് ആംഗ്യം കാണിച്ചിരുന്നു. റിയാദ് സീസണ് കപ്പ് ഫൈനലില് അല് നസ്ര് പരാജയപ്പെട്ട് മടങ്ങുമ്പോള് സ്റ്റാന്ഡില് നിന്ന് എറിഞ്ഞ അല് ഹിലാല് സ്കാര്ഫ് തന്റെ ഷോര്ട്ട്സില് ഇട്ടു വലിച്ചെറിയുന്നതും ദൃശ്യങ്ങള് പുറത്തുവന്നിരുന്നു.