വെള്ളിയാഴ്ച കൊച്ചിയിലെ ജവഹർലാൽ നെഹ്റു സ്റ്റേഡിയത്തിൽ നടന്ന മത്സരത്തിൽ ബെംഗളൂരു എഫ്സിക്കെതിരെ 1-3ന് തോറ്റതിന് പിന്നാലെ കേരള ബ്ലാസ്റ്റേഴ്സ് എഫ്സി ഹെഡ് കോച്ച് മൈക്കൽ സ്റ്റാഹ്രെ അതൃപ്തി പ്രകടിപ്പിച്ചു. ഇരു ടീമുകൾക്കും നിരവധി ഗോളവസരങ്ങൾ ലഭിച്ച 90 മിനിറ്റു നീളമുള്ള ഇഞ്ചോടിഞ്ച് പോരാട്ടത്തിനൊടുവിൽ, എതിരാളികളുടെ ബോക്സിൽ കൃത്യതയില്ലാത്തതിനാൽ ബ്ലാസ്റ്റേഴ്സ് ബ്ലൂസിനെതിരെ തോൽവി ഏറ്റുവാങ്ങി. ഇതോടെ ബ്ലാസ്റ്റേഴ്സ് തങ്ങളുടെ അവസാന 17 ഐഎസ്എൽ മത്സരങ്ങളിൽ ക്ലീൻ ഷീറ്റ് നിലനിർത്തുന്നതിൽ പരാജയപ്പെട്ടു. ഇത് ലീഗിലെ ഏത് ടീമിൻ്റെയും ഏറ്റവും ദൈർഘ്യമേറിയ കണക്കാണ്.
ഹോർഹെ പേരേര ഡയസിന് ബ്ലാസ്റ്റേഴ്സിനോട് എന്താണിത്ര കലിപ്പ്? പകക്ക് പിന്നിൽ പ്രമുഖ മലയാളം കമന്റേറ്ററോ?
ബ്ലാസ്റ്റേഴ്സ് ഡിഫൻഡർ പ്രീതം കോട്ടാലിൻ്റെ പിഴവിൽ മുൻ ബ്ലാസ്റ്റേഴ്സ് ഫോർവേഡ് കൂടിയായ ജോർജ് പെരേര ഡയസ് ബെംഗളൂരു എഫ്സിക്ക് വേണ്ടി സ്കോർഷീറ്റ് തുറന്നപ്പോൾ ആദ്യ മിനിറ്റുകൾ മുതൽ കൊച്ചിയിൽ സംഭവബഹുലമായ മത്സരത്തിന് കളമൊരുങ്ങി. സ്പാനിഷ് ഫോർവേഡ് ജീസസ് ജിമെനെസ് സ്പോട്ട് കിക്കിൽ നിന്ന് ഗോൾ നേടിയതോടെ ആതിഥേയർ സമനിലയിൽ തിരിച്ചെത്തി മൊമെന്റം വീണ്ടെടുത്തു. രണ്ടാം പകുതിയിൽ ജെറാർഡ് സരഗോസയുടെ ബെംഗളൂരു മികച്ച പ്രകടനം കാഴ്ചവച്ചു. സൂപ്പർ-സബ് എഡ്ഗർ മെൻഡസ് ഇരട്ട ഗോളുകൾ നേടി, ISL ലെ അവസാന 12 മത്സരങ്ങളിൽ അവരുടെ ആദ്യ എവേ വിജയം ഉറപ്പാക്കി. ജിമെനെസ്, ക്വാമെ പെപ്ര, രാഹുൽ കെപി എന്നിവരോടൊപ്പം ബ്ലാസ്റ്റേഴ്സ് രണ്ട് ആക്രമണ നീക്കങ്ങൾ സൃഷ്ടിച്ചെങ്കിലും, 2024-25 സീസണിൽ സ്റ്റാറെയുടെ കളിക്കാർ അവരുടെ രണ്ടാമത്തെ ഹോം തോൽവി ഏറ്റുവാങ്ങി.
എങ്കിലും മൊത്തത്തിലുള്ള കണക്കുകളിൽ ബ്ലാസ്റ്റേഴ്സ് മികച്ചു നിൽക്കുന്നു. ഒരർത്ഥത്തിൽ ബ്ലാസ്റ്റേഴ്സ് ആരാധകരെ നിരാശരാക്കുന്നതും ഇതേ കാരണമാണ്. മികച്ച അവസരങ്ങൾ സൃഷ്ടിക്കുക, പന്ത് കൈവശം വെക്കുക, ഷോട്ടുകൾ എടുക്കുക, പാസുകൾ കൃത്യപ്പെടുത്തുക എന്നിവയിൽ ബ്ലാസ്റ്റേഴ്സ് മികച്ച മാർജിനിൽ തന്നെ മികവ് പുലർത്തി. വിജയിച്ച ബെംഗളൂരു എഫ്സി 6 ഷോട്ടുകൾ എടുത്തപ്പോൾ ബ്ലാസ്റ്റേഴ്സ് 15 ഷോട്ടുകൾ എടുത്തു. അതിൽ 3 എണ്ണം മാത്രം ബെംഗളൂരു ലക്ഷ്യത്തിലേക്ക് തൊടുത്തപ്പോൾ ബ്ലാസ്റ്റേഴ്സ് അതിലും മികവ് പുലർത്തി 6 ഓൺ ടാർഗറ്റ് ഷോട്ട് നേടി. കളിയിൽ 57% പൊസെഷൻ നിലനിർത്തിയ ബ്ലാസ്റ്റേഴ്സ് 81% പാസിംഗ് കൃത്യതയോടെ 408 പാസുകൾ പൂർത്തീകരിച്ചപ്പോൾ, ബെംഗളൂരു എഫ്സിക്ക് 74% കൃത്യതയിൽ 336 പാസുകൾ മാത്രമേ പൂർത്തീകരിക്കാനായുള്ളു.
ഇങ്ങനെ കണക്കിലും കളിയിലും മികവ് പുലർത്തിയിട്ട് തോൽക്കുന്നതിന്റെ നിരാശയാണ് ബ്ലാസ്റ്റേഴ്സ് ആരാധകരും കോച്ചും പങ്കുവെക്കുന്നത്. “ഞാൻ അങ്ങേയറ്റം നിരാശനാണ്. ഞങ്ങൾ ഒരു മുഴുവൻ സ്റ്റേഡിയത്തിലാണ് കളിച്ചത്. തികച്ചും ഇലക്ട്രിഫയിങ്ങ് അന്തരീക്ഷമായിരുന്നു അവിടെ. ഈ അന്തരീക്ഷം കേവലം ഉയർന്ന നിലവാരമുള്ളത് മാത്രമല്ല; അതൊരു ലോകോത്തര വികാരമാണെന്ന് ഞാൻ കരുതുന്നു. ഞങ്ങൾ തന്ത്രപരമായ പദ്ധതി കൃത്യമായി നടപ്പിലാക്കിയതായി ഞാൻ കരുതുന്നു. ചിലപ്പോൾ, ഒരു മത്സരത്തിൽ നിങ്ങൾ തെറ്റുകൾ വരുത്തുന്നു. എന്നാൽ ഇത്തരത്തിലുള്ള വലിയ പിഴവ് അത്ര അപൂർവമല്ല.”മത്സരത്തിന് ശേഷമുള്ള പത്രസമ്മേളനത്തിൽ സ്റ്റാഹ്രെ പറഞ്ഞു.
വ്യക്തിഗത പിഴവുകളിൽ നിന്ന് തൻ്റെ ടീം ഗോൾ വഴങ്ങിയതിലുള്ള അതൃപ്തി സ്വീഡിഷ് ഹെഡ് കോച്ച് പങ്കുവെച്ചു. ബെംഗളൂരു എഫ്സിക്കെതിരെ തൻ്റെ ടീം മൂന്ന് ഗോളുകൾ വഴങ്ങിയതെങ്ങനെയെന്ന് വെളിച്ചം വീശിക്കൊണ്ട്, സ്റ്റാഹ്രെ അഭിപ്രായപ്പെട്ടു: “പ്രത്യേകിച്ച് ആദ്യത്തേത്, പിന്നെ ഞങ്ങൾ തിരിച്ചെത്തി. ആദ്യ പകുതിയിൽ തന്നെ ഞങ്ങൾ സമനില പിടിച്ചു. അത് ഞങ്ങൾക്ക് കുറച്ച് ഊർജം നൽകി. ഞങ്ങൾ കൂടുതൽ അടുത്തു കൊണ്ടിരുന്നു. പിന്നെ ഞങ്ങൾ വീണ്ടും ഗോൾ വഴങ്ങി. നമുക്ക് ഊർജം നഷ്ടപ്പെട്ടു. ഞങ്ങൾ ശ്രമിച്ചു, അതിനു ശേഷവും ഞങ്ങൾക്ക് ചില അവസരങ്ങൾ ലഭിച്ചു. വീണ്ടും സമനില നേടാനുള്ള അവസരങ്ങൾ ഞങ്ങൾ സൃഷ്ടിച്ചു. ആദ്യം ചെയ്ത രണ്ടും വലിയ പിഴവുകളായിരുന്നു. എന്നാൽ ഇത് ഫുട്ബോൾ ആണ്.” അദ്ദേഹം തുടർന്നു.
എന്നിരുന്നാലും, കേരള ബ്ലാസ്റ്റേഴ്സ് എഫ്സി ഹെഡ് കോച്ച് തൻ്റെ കളിക്കാരുടെ നിർണായക പിഴവുകൾക്ക് അവരെ കുറ്റപ്പെടുത്താൻ ആഗ്രഹിച്ചില്ല. പരസ്പരം ഒപ്പം നിൽക്കാനും ഒരു ടീമെന്ന നിലയിൽ തിരിച്ചടികൾ വിശകലനം ചെയ്ത് കാര്യങ്ങൾ അവർക്ക് അനുകൂലമാക്കാനും സ്റ്റാഹ്രെ തൻ്റെ കളിക്കാരോട് അഭ്യർത്ഥിച്ചു. “ഒരു നേതാവെന്ന നിലയിൽ, ഒരു പരിശീലകനെന്ന നിലയിൽ ഇത് എനിക്ക് വളരെ പ്രധാനമാണ്. ആരെയും തള്ളരുത്. ഞങ്ങൾ ഒരു ടീമാണ്. അപ്പോൾ എല്ലാവർക്കും അത് കാണാൻ കഴിയും. കളി കഴിഞ്ഞ് ഞങ്ങളും നേരെ സംസാരിച്ചു. നമ്മൾ പരസ്പരം പിന്തുണയ്ക്കണം. ”അദ്ദേഹം പറഞ്ഞു.
“പിന്നെ പിന്നിലെ നിരയിലെ പിഴവാണെന്ന് എല്ലാവർക്കും അറിയാം. അത് ഞങ്ങളുടെ ഗോൾകീപ്പറുടെ പിഴവാണ്. പക്ഷെ അത് സമ്മതിക്കുമ്പോൾ എല്ലാവർക്കും അറിയാം. അപ്പോൾ ഞങ്ങൾ മുന്നോട്ട് പോയി പരസ്പരം പിന്തുണയ്ക്കുന്നു. ബ്ലാസ്റ്റേഴ്സ് കുടുംബവും ഞങ്ങളുടെ കളിക്കാർക്ക് പിന്തുണ നൽകുമെന്ന് ഞാൻ പ്രതീക്ഷിക്കുന്നു. ഈ സാഹചര്യത്തിൽ വിരൽ ചൂണ്ടുന്നത് എളുപ്പമാണ്. ഞങ്ങളുടെ തെറ്റുകളിൽ നിന്ന് ഞങ്ങൾ പഠിക്കുമെന്ന് പ്രതീക്ഷിക്കുന്നു.”അദ്ദേഹം ഉപസംഹരിച്ചു.