ആരാധകരുടെ മനം കവര്‍ന്ന് നീ്ണ്ട കാത്തിരിപ്പ് അവസാനിപ്പിച്ച് പ്‌ളേഓഫില്‍ എത്തുകയും ഐഎസ്എല്‍ ഫൈനല്‍ കളിക്കുകയും ചെയ്ത കേരളാ ബ്‌ളാസ്‌റ്റേഴ്‌സ് യൂറോപ്പിലേക്ക് പറക്കുന്നു. വിദേശത്ത് പ്രീ സീസണ്‍ പര്യടനം നടത്താനാണ് ബ്ലാസ്റ്റേഴ്‌സ് ആലോചിക്കുന്നതെന്നാണ് ക്ലബ് സ്‌പോര്‍ട്ടിങ് ഡയറക്ടര്‍ കരോളിസ് സ്‌കിന്‍കിസ് മാധ്യമങ്ങളോട് പറഞ്ഞു.
കഴിഞ്ഞ സീസണിലേതിനു സമാനമായ മികച്ചൊരു പ്രീ സീസണാണ് ഇക്കുറിയും ബ്ലാസ്റ്റേഴ്‌സ് പദ്ധതിയിടുന്നത്. കഴിഞ്ഞ സീസണില്‍ ടീം ഫൈനല്‍ കളിച്ച സാഹചര്യത്തില്‍ ഈ സീസണില്‍ ടീമിന് മേല്‍ വലിയ സമ്മര്‍ദ്ദമുണ്ടാകുമെന്നും അതുകൊണ്ടു തന്നെ മികച്ച സീസണ്‍ ലക്ഷ്യമിട്ടുള്ള ഒരു തയ്യാറെടുപ്പാണ് മാനേജ്‌മെന്റ് ലക്ഷ്യമിടുന്നതെന്നും പറഞ്ഞു.
വിദേശ പര്യടനമടങ്ങുന്ന ദൈര്‍ഘ്യമേറിയ പ്രീ സീസണാണ് ക്ലബ് ലക്ഷ്യമിടുന്നത്. അടുത്ത സീസണിലേക്ക് ചില ഇന്ത്യന്‍ താരങ്ങളെ ഐ-ലീഗില്‍ നിന്ന് എടുക്കാനും ബ്ലാസ്റ്റേഴ്‌സിന് പദ്ധതിയുണ്ട്. ഐഎസ്എല്‍ എട്ടാം സീസണില്‍ ടീം ഫൈനലിലേക്ക് കുതിച്ചതിന് പിന്നില്‍ മികച്ച ഇന്ത്യന്‍ യുവതാരങ്ങളുടെ പ്രകടനവും ശ്രദ്ധേയമായിരുന്നു. ജീക്‌സന്‍ സിങ്, ആയുഷ് അധികാരി, പ്യൂയ്റ്റിയ, റൂയിവ ഹോര്‍മിപാം, പ്രങ്‌സുഖാന്‍ ഗില്‍ തുടങ്ങിയ താരങ്ങള്‍ ബ്ലാസ്റ്റേഴ്‌സ് ആദ്യ ഇലവനില്‍ സ്ഥിരം സാന്നിധ്യങ്ങളായിരുന്നു. കിട്ടിയ അവസരം നന്നായി കെപി രാഹുല്‍, സഞ്ജീവ് സ്റ്റാലിന്‍, വിന്‍സി ബാരെറ്റോ എന്നിവര്‍ ഉപയോഗിക്കുകയും ചെയ്തു. എന്നാല്‍ ഇത്തവണ ഇവര്‍ യുവതാരങ്ങള്‍ അല്ലെന്നും പരിചയ സമ്പന്നരാണെന്നും കരോളിന്‍സ് പറയുന്നു.
പ്രതീക്ഷയുടെ സമ്മര്‍ദങ്ങളില്ലാതിരുന്നതിനാല്‍ ഈ സീസണില്‍ ടീമിലെ യുവതാരങ്ങള്‍ക്ക്് തകര്‍പ്പന്‍ പ്രകടനം കാഴ്ചവെയ്ക്കാന്‍ സാധിച്ചിരുന്നു. എന്നാല്‍ അടുത്ത സീസണില്‍ ഇനി അങ്ങിനെ ആയിരിക്കില്ല. കടുത്ത സമ്മര്‍ദ്ദത്തില്‍ കളിക്കേണ്ടി വരും. പ്രകടനത്തില്‍ സ്ഥിരത പുലര്‍ത്താനാണ് ബ്ലാസ്റ്റേഴ്‌സ് യുവതാരങ്ങള്‍ ഇനി ശ്രദ്ധിക്കേണ്ടതെന്നും പറഞ്ഞു. കഴിഞ്ഞ സീസണില്‍ മികച്ച തയ്യാറെടുപ്പാണ് ടീം നടത്തിയത്. ജൂലൈ ആദ്യം തന്നെ കൊച്ചിയില്‍ പ്രീ സീസണ്‍ തുടങ്ങിയ ടീം ഒട്ടേറെ തയ്യാറെടുപ്പ് മത്സരങ്ങളും പ്രധാന ടൂര്‍ണമെന്റായ ഡ്യൂറാന്‍ഡ് കപ്പും കളിച്ചിരുന്നു.