ലോക കപ്പ് യോഗ്യതാ മത്സരത്തില് ബ്രസീലിനെതിരേ സമനില വഴങ്ങിയെങ്കിലും അര്ജന്റീനയ്ക്ക് ഖത്തറിലേക്ക് ടിക്കറ്റ്. ഇന്ന് നടന്ന മറ്റൊരു മത്സരത്തില് ചിലി ഇക്വഡോറിനോട് എതിരില്ലാത്ത രണ്ടു ഗോളുകള്ക്ക് തോറ്റതോടെയാണ് അര്ജന്റീന ഔദ്യോഗികമായി ഖത്തര് ലോക കപ്പിന് യോഗ്യത ഉറപ്പാക്കിയത്.
ആരാധകര് ആവേശത്തോടെ കാത്തിരുന്ന അര്ജന്റീന-ബ്രസീല് ലോക കപ്പ് യോഗ്യത മത്സരം ഗോള്രഹിത സമനിലയിലാണ് കലാശിച്ചത്. ഇരുടീമുകളും ശ്രദ്ധയോടെ കളിച്ച ആദ്യ പകുതിയില് പന്തിലുള്ള ആധിപത്യം അര്ജന്റീനക്കായിരുന്നു എങ്കിലും കൂടുതല് മുന്നേറ്റങ്ങളൊന്നും രണ്ടു ടീമുകളുടെയും ഭാഗത്തു നിന്നും കണ്ടില്ല. രണ്ടാം പകുതി ഇരുടീമുകളുടെയും മുന്നേറ്റം കൊണ്ട് ആദ്യ പകുതിയേക്കാള് ആവേശകരമായിരുന്നു എങ്കിലും ഗോള് മാത്രം അകന്നു നിന്നു.
കളി അവസാനിക്കാന് നിമിഷങ്ങള് മാത്രം ബാക്കിനില്ക്കേ മെസ്സിയുടെ ഒരു ലോങ് റേഞ്ചര് ബ്രസീല് ഗോളി ആലിസണ് തടുത്തിട്ടത് മത്സരഫലത്തില് നിര്ണായകമായി. 61-ാം മിനിറ്റില് ഫ്രെഡിന്റെ ഷോട്ട് ക്രോസ്ബാറിലിടിച്ച് മടങ്ങിയത് ബ്രസീലിനും തിരിച്ചടിയായി.
ഗ്രൂപ്പില് 13 മത്സരങ്ങളില് നിന്ന് 35 പോയിന്റുമായി ബ്രസീല് ഒന്നാം സ്ഥാനത്ത് തുടരുകയാണ്. 29 പോയിന്റുമായി അര്ജന്റീന രണ്ടാമതുണ്ട്. ബ്രസീല് ഒക്ടോബറില് തന്നെ ലോക കപ്പ് യോഗ്യത ഉറപ്പിച്ചിരുന്നു.