ശ്രീലങ്കൻ ടെസ്റ്റ് പര്യടനം, ഇംഗ്ലണ്ട് ടെസ്റ്റ് പര്യടനം എന്നിവയിൽ നിന്ന് തഴയപ്പെട്ടതിന് പിന്നാലെ ഇന്ത്യന് ടീം മാനേജ്മെന്റിനെതിരെ തുറന്നടിട്ട് വൃദ്ധിമാന് സാഹ. പരിശീലകന് രാഹുല് ദ്രാവിഡും ബിസിസിഐ പ്രസിഡന്റ് സൗരവ് ഗാംഗുലിയും വിശ്വാസ വഞ്ചന കാണിച്ചുവെന്നും നീതികാട്ടിയില്ലെന്നും സാഹ ആരോപിച്ചു.
‘മുന്നോട്ട് എന്നെ പരിഗണിക്കില്ലെന്ന നിലപാടാണ് ടീം മാനേജ്മെന്റ് സ്വീകരിച്ചത്. ഇന്ത്യന് ടീമിന്റെ ഭാഗമായിരുന്നതിനാലാണ് ഇതുവരെ തുറന്ന് പറയാതിരുന്നത്. പരിശീലകന് രാഹുല് ദ്രാവിഡ് തന്നെ എന്നോട് വിരമിക്കാന് നിര്ദേശിച്ചിരുന്നു എന്ന് സാഹ നേരത്തെ തന്നെ പറഞ്ഞിരുന്നു.
ഇംഗ്ലണ്ട് ടെസ്റ്റിൽ എങ്കിലും തനിക്ക് അവസരം കിട്ടും എന്നാണ് കരുതിയതെന്നും എന്നാൽ അവിടെയും ചതി കിട്ടിയെന്നും സാഹ പറഞ്ഞു.
‘കാലഘട്ടത്തിനനുസരിച്ചുള്ള മാറ്റം അനിവാര്യമാണെങ്കിലും ഏകപക്ഷീയമായി സീനിയര് താരത്തോട് വിരമിക്കാന് ആവശ്യപ്പെടുന്നത് കായിക താരത്തിന്റെ മാനസിക വീര്യത്തെ കെടുത്തുമെന്നുറപ്പാണ്. ടീം മാനേജ്മെന്റില് നിന്ന് പിന്തുണ പ്രതീക്ഷിക്കുമ്പോള് അത് ലഭിക്കുന്നില്ല.’
‘ന്യൂസീലന്ഡിനെതിരായ കാണ്പൂര് ടെസ്റ്റില് വേദന സംഹാരി കഴിച്ചാണ് ഇറങ്ങിയത്. പുറത്താവാതെ 61 റണ്സും നേടി. ബംഗാള് ടീമിന്റെ വാട്സപ്പ് ഗ്രൂപ്പില് സൗരവ് ഗാംഗുലി അന്ന് എന്നെ പ്രശംസിച്ച് സന്ദേശം അയച്ചിരുന്നു. നീണ്ടനാളത്തേക്ക് ബിസിസിഐയുടെ പിന്തുണ ഉണ്ടാവുമെന്ന് അദ്ദേഹം ഉറപ്പ് നല്കിയിരുന്നു.’
‘ബോര്ഡ് പ്രസിഡന്റിന്റെ അത്തരമൊരു സന്ദേശം എനിക്ക് വലിയ ആത്മവിശ്വാസം നല്കിയിരുന്നു. എന്നാല് കാര്യങ്ങളെല്ലാം വളരെ വേഗം മാറിമറിഞ്ഞത് ഞാനറിഞ്ഞില്ല’ സാഹ പറഞ്ഞു.
ഇന്ത്യയ്ക്കായി 40 ടെസ്റ്റില് നിന്ന് 129.41 ശരാശരിയില് 353 റണ്സാണ് സാഹ നേടിയത്. മൂന്ന് സെഞ്ച്വറിയും ആറ് അര്ധ സെഞ്ച്വറിയും നേടി. 9 ഏകദിനത്തില് നിന്ന് 41 റണ്സാണ് നേടാനായത്.