ഐപിഎല്ലില്‍ ബോളിംഗില്‍ മോശം പ്രകടനം തുടരുന്ന ആര്‍സിബി താരം ഹര്‍ഷല്‍ പട്ടേലിനെതിരെ ആഞ്ഞടിച്ച് പാകിസ്ഥാന്‍ മുന്‍ സ്പിന്നര്‍ ഡാനിഷ് കനേരിയ. ഹര്‍ഷലിന്റെ ബോളിംഗ് കാണുമ്പോള്‍ ഒട്ടും താത്പര്യമില്ലാത്തതു പോലെയാണ് കളിക്കുന്നതെന്നു തോന്നിയെന്നും പഴയതു പോലെ ക്രിക്കറ്റ് ഇപ്പോള്‍ അദ്ദേഹം ആസ്വദിക്കുന്നില്ലെന്നും കനേരിയ നിരീക്ഷിച്ചു.
ഹര്‍ഷല്‍ പട്ടേല്‍ ഐപിഎല്ലില്‍ മികച്ച പ്രകടനം കാഴ്ചവെയ്ക്കുകയും അതു വഴി ഇന്ത്യന്‍ ടീമിലെത്തുകയും ചെയ്തിട്ടുള്ള താരമാണ്. പക്ഷെ ഇത്തവണത്തെ ബോളിംഗ് കാണുമ്പോള്‍ ഹര്‍ഷല്‍ ഒട്ടും താത്പര്യമില്ലാത്തതു പോലെയാണ് കളിക്കുന്നതെന്നു തോന്നി. പഴയതു പോലെ ക്രിക്കറ്റ് ഇപ്പോള്‍ അദ്ദേഹം ആസ്വദിക്കുന്നില്ല.
ലൈനും ലെങ്തുമൊന്നും പാലിക്കാന്‍ ഹര്‍ഷലിനു കഴിയുന്നില്ല. മുഖഭാവം കാണുമ്പോള്‍ അദ്ദേഹം ഗെയിം ആസ്വദിക്കുന്നില്ലെന്നാണ് തോന്നിയത്. ഹര്‍ഷലിനു യഥാര്‍ത്ഥത്തില്‍ എന്താണ് സംഭവിച്ചതെന്നു മനസ്സിലാവുന്നില്ല. ചെന്നൈയ്ക്കെതിരായ കളിയിലും അദ്ദേഹത്തിനു നന്നായി ബോള്‍ ചെയ്യാന്‍ സാധിച്ചില്ല. രണ്ടു തവണ ബീമറുകള്‍ എറിഞ്ഞതു കാരണം ഓവര്‍ പൂര്‍ത്തിയാക്കാന്‍ സാധിക്കാതെ ഹര്‍ഷലിനെ മാറ്റുകയും ചെയ്തിരുന്നു.
നമ്മള്‍ നേരത്തേ കണ്ടിട്ടുള്ള, നമുക്ക് കണ്ടു പരിചയമുള്ള ഹര്‍ഷല്‍ പട്ടേല്‍ ഇങ്ങനെയല്ല. ഒരുപാട് കാര്യങ്ങള്‍ അദ്ദേഹത്തിനു ഇനി ചെയ്യേണ്ടതുണ്ട്. അല്ലെങ്കില്‍ ഇനിയൊരിക്കലും ഹര്‍ഷല്‍ ഇന്ത്യക്കു വേണ്ടി കളിക്കില്ല. കാരണം ഇന്ത്യന്‍ ടീമിലേക്കു മികച്ച ഒരുപാട് ബോളര്‍മാര്‍ വന്നുകൊണ്ടിരിക്കുകയാണ്- കനേരിയ വിലയിരുത്തി.
