ഏകദിന ലോക കപ്പിലെ കറുത്ത കുതിരകള് ആരാകുമെന്ന് സൂചന നല്കി മുന് ഇന്ത്യന് നായകനും പരിശീലകനുമായിരുന്ന അനില് കുംബ്ലെ. ക്രിക്കറ്റിലെ പുതുമുഖങ്ങളായ അഫ്ഗാനിസ്ഥാന് ഈ ലോക കപ്പില് അത്ഭുതം കാട്ടുമെന്നാണ് കുംബ്ലെ പറയുന്നത്.
ലോക കപ്പ് കളിക്കുന്ന വമ്പന് ടീമുകളെ ഞെട്ടിക്കാനുള്ള കരുത്ത് അഫ്ഗാനുണ്ടെന്നാണ് കുംബ്ലെ അഭിപ്രായപ്പെടുന്നത്.
“ഏഷ്യ കപ്പില് മികച്ച പ്രകടനമായിരുന്നു അവരുടേത്. ഇന്ത്യയുമായുള്ള മത്സരം സമനിലയിലാക്കാന് അവര്ക്കായി. ഒരു മത്സരത്തില് ബംഗ്ലാദേശിനെ തോല്പ്പിച്ചുവെന്ന് മാത്രമല്ല, പാകിസ്ഥാനെ വിറപ്പിയ്ക്കാനും അഫ്ഗാന് കഴിഞ്ഞിരുന്നു. റാഷിദ് ഖാന്, മുഹമ്മദ് നബി, മുജീബ് റഹമാന് എന്നിവര് അടങ്ങുന്ന ടീം തീര്ച്ചയായും എതിര് ടീമുകളെ വിറപ്പിക്കും; കുംബ്ലെ നിരീക്ഷിക്കുന്നു.
ബാറ്റിങ്ങില് മുഹമ്മദ് ഷഹ്സാദിനെ പോലെയുള്ള താരങ്ങള് തുടക്കം മുതല് അക്രമിച്ച് കളിക്കാന് കെല്പ്പുള്ള താരമാണ്. എതിരാളികളെ സമ്മര്ദ്ദത്തിലാക്കാന് ഷഹ്സാദിന് സാധിക്കും. ആദ്യം ബാറ്റ് ചെയ്ത് വലിയ സ്കോര് നേടുകയായിരിക്കും അഫ്ഗാന് ഗെയിം പ്ലാന്. പിന്നീട് സ്പിന്നര്മാര് വിക്കറ്റ് നേടുകയും ചെയ്താല് അഫ്ഗാന് ചില്ലറ ബുദ്ധിമുട്ടൊന്നുമായിരിക്കില്ല എതിരാളികള്ക്ക് ഉണ്ടാക്കുകയെന്നും കുംബ്ലെ കൂട്ടിച്ചേര്ത്തു.
ഈ മാസം 30നാണ് ഏകദിനലോകപ്പ് ആരംഭിക്കുക. ജൂണ് ഒന്നിന് ഓസ്ട്രേലിയക്കെതിരെയാണ് അഫ്ഗാന്റെ ആദ്യ മത്സരം.