2007ലെ ടി20 ലോക കപ്പിനുള്ള ഇന്ത്യന്‍ ടീമിന്റെ നായകനായി തന്നെ തെരഞ്ഞെടുക്കുമെന്ന് പ്രതീക്ഷിച്ചിരുന്നതായി ഇന്ത്യന്‍ മുന്‍ താരം യുവരാജ് സിംഗ്. എന്നാല്‍ എം.എസ് ധോണിയെ നായകനാക്കിയതില്‍ ഒരു ടീം മാന്‍ എന്ന നിലയില്‍ താന്‍ പൂര്‍ണ പിന്തുണ നല്‍കിയെന്നും യുവരാജ് പറഞ്ഞു.
“ഏകദിന ലോക കപ്പില്‍ ഇന്ത്യ തിരിച്ചടി നേരിട്ട് നില്‍ക്കുന്ന സമയം. ഇന്ത്യന്‍ ക്രിക്കറ്റില്‍ അത് വലിയ അലയൊലികള്‍ സൃഷ്ടിച്ചിരുന്നു. പിന്നാലെ ഇന്ത്യയുടെ രണ്ട് മാസം നീണ്ട് നില്‍ക്കുന്ന ഇംഗ്ലണ്ട് പര്യടനം. അതിന് പിന്നാലെ ദക്ഷിണാഫ്രിക്കയ്ക്കും അയര്‍ലന്‍ഡിനും എതിരായ പരമ്പര. ഇതിന് പിന്നാലെയായിരുന്നു ടി20 ലോക കപ്പ്.”
“നാല് മാസത്തോളം ഇന്ത്യയില്‍ നിന്ന് വിട്ട് നില്‍ക്കുന്ന അവസ്ഥയായിരുന്നു. അതിനാല്‍ സീനിയര്‍ കളിക്കാരെല്ലാം തങ്ങള്‍ക്ക് വിശ്രമം വേണമെന്ന ചിന്തയിലായിരുന്നു. ടി20 ലോക കപ്പിന് അവര്‍ ശ്രദ്ധ കൊടുത്തില്ല. ഇതോടെ ടി20 ലോക കപ്പില്‍ ഇന്ത്യയുടെ ക്യാപ്റ്റനാവാം എന്ന് ഞാന്‍ പ്രതീക്ഷിച്ചു.”
“എന്നാലവര്‍ ധോണിയെ ആണ് ക്യാപ്റ്റനായി പ്രഖ്യാപിച്ചത്. ക്യാപ്റ്റന്‍ ആരായാലും നമ്മള്‍ അയാളെ പിന്തുണയ്ക്കും. രാഹുലായാലും സൗരവ് ആയാലും ആരായാലും. ഒരു ടീം മാന്‍ ആയിരിക്കണം നമ്മള്‍. ഞാന്‍ അങ്ങനെ ആയിരുന്നു” യുവരാജ് പറഞ്ഞു. നായകനായില്ലെങ്കിലും യുവരാജിന്‍റെ പ്രകടനം ഇന്ത്യയുടെ കിരീടം നേട്ടത്തില്‍ നിര്‍ണായകമായി.