ടെസ്റ്റ് ക്രിക്കറ്റില്‍ നിന്നും രോഹിത് ശര്‍മ്മ വിരമിച്ചതോടെ മറ്റ് സീനിയര്‍ താരങ്ങളുടെ തീരുമാനം ആരാധകര്‍ ഉറ്റുനോക്കിയിരുന്നു. വിരാട് കോഹ്ലി, രവീന്ദ്ര ജഡേജ തുടങ്ങിയ താരങ്ങളും അവരുടെ കരിയറിന്റെ അവസാന ഘട്ടത്തിലാണ്. രോഹിത് ശര്‍മ്മയ്ക്ക് ശേഷം വിരാട് കോഹ്ലിയാവും വിരമിക്കുകയെന്ന് റിപ്പോര്‍ട്ടുകളുണ്ടെങ്കിലും താരത്തിന്റെ ഭാഗത്തുനിന്ന് ഇതുവരെ പ്രതികരണമൊന്നുമുണ്ടായിട്ടില്ല. എന്നാല്‍ സൂപ്പര്‍താരം തന്റെ തീരുമാനം ബിസിസിഐ അറിയിച്ചുവെന്നാണ് പുതിയ വിവരം.
36കാരനായ കോഹ്ലി സമീപകാലത്തായി ടെസ്റ്റില്‍ ഓസ്‌ട്രേലിയക്കെതിരെ ഒരു സെഞ്ച്വറി നേടിയതൊഴിച്ചാല്‍ മറ്റ് കാര്യമായ പ്രകടനങ്ങളൊന്നും കാഴ്ചവച്ചിട്ടില്ല. അഞ്ച് ടെസ്റ്റുകളില്‍ നിന്നാണ് ഒരു സെഞ്ച്വറി താരം നേടിയത്. കുറഞ്ഞ സ്‌കോറുകളിലാണ് കൂടുതല്‍ മത്സരങ്ങളിലും കോഹ്ലി പുറത്തായിട്ടുളളത്. നിലവില്‍ ടെസ്റ്റ് ക്രിക്കറ്റില്‍ മോശം ഫോമിലൂടെയാണ് കോഹ്ലി കടന്നുപോവുന്നത്. വിരമിക്കല്‍ തീരുമാനം ബിസിസിഐയെ അറിയിച്ചെങ്കിലും ഇംഗ്ലണ്ട് സീരീസില്‍ കൂടി തുടരാന്‍ വിരാട് കോഹ്ലിയോട്‌ ക്രിക്കറ്റ് ബോര്‍ഡ് ആവശ്യപ്പെട്ടതായും വിവരമുണ്ട്.
2014ലാണ് കോഹ്ലി ഇന്ത്യയുടെ ടെസ്റ്റ് ടീം ക്യാപ്റ്റനായത്. ഇന്ത്യയുടെ എറ്റവും മികച്ച ടെസ്റ്റ് ക്യാപ്റ്റന്‍ എന്നാണ് താരം അറിയപ്പെടുന്നത്. ഓസ്‌ട്രേലിയയില്‍ ആദ്യമായി ഒരു ടെസ്റ്റ് പരമ്പര കോഹ്ലിയുടെ ക്യാപ്റ്റന്‍സിയിലാണ് ഇന്ത്യ നേടിയത്. 60 മത്സരങ്ങള്‍ കോഹ്ലിക്ക് കീഴില്‍ ഇന്ത്യന്‍ ടീം കളിച്ചപ്പോള്‍ അതില്‍ 40 ടെസ്റ്റുകളിലും ജയിക്കാനായി. 17 മത്സരങ്ങള്‍ മാത്രമാണ് തോറ്റത്. 11 എണ്ണം സമനിലയിലായി.