വലത് കാൽമുട്ടിന് പരിക്കേറ്റ ഇന്ത്യൻ ഓൾറൗണ്ടർ രവീന്ദ്ര ജഡേജ ഏഷ്യാ കപ്പിൽ നിന്ന് പുറത്തായി. ബിസിസിഐ ഓൾ-ഇന്ത്യ സീനിയർ സെലക്ഷൻ കമ്മിറ്റി ജഡേജയുടെ പകരക്കാരനായി അക്സർ പട്ടേലിനെ തിരഞ്ഞെടുത്തു.
“ഇപ്പോൾ നടന്നുകൊണ്ടിരിക്കുന്ന ഏഷ്യാ കപ്പിൽ രവീന്ദ്ര ജഡേജയ്ക്ക് പകരക്കാരനായി അഖിലേന്ത്യ സീനിയർ സെലക്ഷൻ കമ്മിറ്റി അക്സർ പട്ടേലിനെ തിരഞ്ഞെടുത്തു. വലത് കാൽമുട്ടിന് പരിക്കേറ്റ രവീന്ദ്ര ജഡേജ ടൂർണമെന്റിൽ നിന്ന് പുറത്തായി. അദ്ദേഹം ഇപ്പോൾ ബിസിസിഐ മെഡിക്കൽ ടീമിന്റെ മേൽനോട്ടത്തിലാണ്,” ബിസിസിഐ പത്രക്കുറിപ്പിൽ പറയുന്നു.
നേരത്തെ ടീമിലെ സ്റ്റാൻഡ്‌ബൈകളിൽ ഒരാളായി അക്സർ പട്ടേലിനെ തിരഞ്ഞെടുത്തിരുന്നു, ഇപ്പോൾ ഉടൻ തന്നെ ദുബായിൽ ടീമിനൊപ്പം ചേരും.
പാക്കിസ്ഥാനെതിരായ മത്സരത്തിൽ 35 റൺസുമായി മികച്ച പ്രകടനം പുറത്തെടുക്കാൻ ജഡേജക്ക് സാധിച്ചിരുന്നു. ഒരു ഓൾറൗണ്ടർ എന്ന നിലയിൽ ജഡേജ ഹോങ്കോങിന് എതിരെയും മികച്ച പ്രകടനം നടത്തിയിരുന്നു.
ജഡേജയുടെ പരിക്ക് ടീമിന് വലിയ തിരിച്ചടിയാകാൻ സാധ്യതയുണ്ട് പ്രത്യേകിച്ച് നിർണായക മത്സരങ്ങൾ വരാനിരിക്കെ.