ഓൾറൗണ്ടർ അക്‌സർ പട്ടേൽ നാളെ ഫിറ്റ്നസ് നേടുന്നതിൽ പരാജയപ്പെട്ടാൽ, രവിചന്ദ്രൻ അശ്വിൻ 2023 ലോകകപ്പ് ഇന്ത്യൻ ടീമിന്റെ ഭാഗമാകുമെന്ന് പ്രതീക്ഷ പങ്കുവെച്ചിരിക്കുകയാണ് മുൻ ഇന്ത്യൻ ബാറ്റർ റോബിൻ ഉത്തപ്പ. ലോകകപ്പ് ടീമിൽ എന്തെങ്കിലും തരത്തിലുള്ള മാറ്റം കൊണ്ടുവരാനുള്ള അവസാന തിയതി നാളെ ആയിരിക്കെ രവിചന്ദ്രൻ അശ്വിൻ ഇന്ത്യൻ ടീമിൽ ഇടം നേടുമോ എന്നതാണ് എല്ലാവരും ഓർത്തിരിക്കുന്ന കാര്യം.
“അക്‌സർ പട്ടേലിന് ഫിറ്റ്നസ് വീണ്ടുണ്ടാക്കാൻ സാധിച്ചില്ലെങ്കിൽ അശ്വിൻ ടീമിലെത്തുമെന്ന് കരുതുന്നു. ഇന്ത്യയിലെ പരിചയസമ്പത്ത് കൊണ്ട് അവൻ വളരെ അപകടകാരിയായ ഒരു ബൗളറായിരിക്കും. ഇത്രയും അനുഭവസമ്പത്ത് ഉള്ള താരങ്ങൾ കുറവാണ്, അവൻ എന്തായാലും ടീമിലെത്തണം. ഓസ്‌ട്രേലിയൻ പരമ്പരയിൽ അശ്വിൻ ബാറ്റർമാരെ കബളിപ്പിക്കുന്നത് നാം കണ്ടതാണ്. അവന് കിട്ടിയ അവസരത്തിൽ മികച്ച പ്രകടനം കാഴ്ച്ചവെച്ച അദ്ദേഹത്തിന് സാധിച്ചിട്ടുണ്ട്.” ഉത്തപ്പ പറഞ്ഞു.
അശ്വിനെ സംബന്ധിച്ച് പറഞ്ഞാൽ കിട്ടിയ അവസരങ്ങളിൽ എല്ലാം മികച്ച പ്രകടനം നടത്തിയതിനാൽ തന്നെ താരം ടീമിൽ വേണമെന്ന ആവശ്യം ഇപ്പോൾ വളരെ ശക്തമാണ്. നിലവിൽ ഇന്ത്യൻ ക്രിക്കറ്റിലെ ഏറ്റവും ബുദ്ധിമാനായ താരം എന്ന നിലയിലാണ് അശ്വിൻ അറിയപെടുന്നത്. ഏത് സാഹചര്യത്തിലും തന്റെ മനോഹരമായ സ്പിൻ തന്ത്രങ്ങളിലൂടെ എതിരാളിയെ തകർക്കാനുള്ള മികവും എടുത്ത് പറയേണ്ടതാണ്.
സ്വന്തം മണ്ണിൽ അടക്കുന്ന ലോകകപ്പ് ഏത് വിധത്തിലും ജയിക്കാനുള്ള തത്രപ്പാടിലാണ് നിലവിൽ ഇന്ത്യ.