ഇന്ത്യന്‍ ക്രിക്കറ്റിന് ഏറെ പ്രതീക്ഷ സമ്മാനിച്ച പേസര്‍ ടി. നടരാജനെ പരിക്ക് വിടാതെ പിന്തുടരുന്നു. കാല്‍മുട്ടിലെ പരിക്ക് വഷളായ നടരാജന് തമിഴ്‌നാട് ടീമില്‍ നിന്ന് പുറത്തായി. വിജയ് ഹസാരെ ട്രോഫിക്ക് തയാറെടുക്കുന്ന തമിഴ്‌നാടിന് തിരിച്ചടിയാണ് നടരാജന്റെ പുറത്താകല്‍.
സയ്യിദ് മുഷ്താഖ് അലി ട്രോഫി ക്വാര്‍ട്ടറിലും സെമി ഫൈനലിലും തമിഴ്‌നാടിനായി നടരാജന് കളിച്ചിരുന്നില്ല. ഫൈനലില്‍ കളിച്ചെങ്കിലും ധാരാളം റണ്‍സ് വഴങ്ങിയിരുന്നു. പരിക്ക് ഭേദമാകുന്നതുവരെ നടരാജന് ബംഗൂളുരുവിലെ നാഷണല്‍ ക്രിക്കറ്റ് അക്കാദമിയില്‍ പരിചരണത്തിലായിരിക്കും.
മൂര്‍ച്ചയുള്ള യോര്‍ക്കറുകളിലൂടെ ബാറ്റര്‍മാരെ പിടിച്ചുകെട്ടുന്ന നടരാജന് ഇന്ത്യന്‍ ക്രിക്കറ്റിലെ ഭാവി താരമായാണ് വിലയിരുത്തപ്പെടുന്നത്. എന്നാല്‍ സമീപ കാലത്തായി പരിക്ക് താരത്തെ നിരന്തരം വേട്ടയാടുകയാണ്. ഐപിഎല്ലില്‍ സണ്‍റൈസേഴ്‌സ് ഹൈദരാബാദിന്റെ താരമായ നടരാജന് ടൂര്‍ണമെന്റ് നഷ്ടമായിരുന്നു. ടി20 ലോക കപ്പിനുള്ള ഇന്ത്യന്‍ ടീമിലും നടരാജന് ഇടം ലഭിച്ചിരുന്നില്ല.