ഇംഗ്ലണ്ട്-വിന്ഡീസ് രണ്ടാം ക്രിക്കറ്റ് ടെസ്റ്റില് ബെന് സ്റ്റോക്സ് എന്ന ക്രിക്കറ്ററുടെ അസാമാന്യ പ്രകടനത്തിനാണ് ക്രിക്കറ്റ് ലോകം സാക്ഷ്യം വഹിച്ചത്. ഒരു സെഞ്ച്വറിയടക്കം 254 റണ്സും മൂന്നു വിക്കറ്റും, ഒരു പക്കാ ഓള്റൗണ്ട് പ്രകടനം. അതിനുള്ള കൂലി വിജയത്തിലൂടെയും റാങ്കിംഗ് മുന്നേറ്റത്തിലൂടെയും സ്റ്റോക്സിന് ലഭിക്കുക തന്നെ ചെയ്തു. ഇപ്പോഴിതാ കളിക്കിടയിലെ സ്റ്റോക്സിന്റെ ഒരു അസാമാന്യ പ്രവൃത്തിയാണ് ശ്രദ്ധ നേടിയിരിക്കുന്നത്.
ബോള് ചെയ്ത ശേഷം ബൗണ്ടറി വരെ ഓടി ഫോര് തടയുന്ന സ്റ്റോക്സിന്റെ പ്രകടനമാണ് ക്രിക്കറ്റ് ലോകത്തെ അത്ഭുതപ്പെടുത്തിയിരിക്കുന്നത്. വിന്ഡീസിന്റെ രണ്ടാം ഇന്നിംഗ്സില് 43-ാം ഓവറിലാണ് സംഭവം. വിന്ഡീസിനെ തകര്ച്ചയില് കരകയറ്റി കൊണ്ടുവരുന്നതിന്റെ ശ്രമത്തിലായിരുന്നു ഷമര് ബ്രൂക്സും ജെര്മന് ബ്ലാക്ക്വുഡും. സെഞ്ച്വറി കൂട്ടുകെട്ടുമായി ഇരുവരും അടിയുറച്ച് നില്ക്കവേയാണ് സ്റ്റോക്സ് എറിഞ്ഞ പന്ത് ബ്ലാക്ക്വുഡ് മിഡ് ഓഫിലൂടെ ബൗണ്ടറി ലക്ഷ്യമാക്കി തുടുത്തത്.
മിഡ് ഓഫ് ഉള്പ്പെടെ ഒഴിച്ചിട്ട് വിന്ഡീസിനെ പ്രതിരോധത്തിലാക്കുന്ന വിധത്തിലാണ് ക്യാപ്റ്റന് ജോ റൂട്ട് ഫീല്ഡ് സെറ്റ് ചെയ്തത്. അതിനാല് ഫോര് തടയാന് സ്റ്റോക്സ് തന്നെ ശ്രമിക്കുകയായിരുന്നു. അത്ര വേഗത്തിലല്ലാതെ പന്ത് ബൗണ്ടറിയിലേക്ക് നീങ്ങുന്നതിനിടെ ബോള് ചെയ്തശേഷം ഓടിയെത്തിയ സ്റ്റോക്സ് നിരങ്ങിയെത്തി ലോങ് ഓഫില് വെച്ച് പന്ത് തടയുകയായിരുന്നു.
പിന്നീട് ഇതേ ഓവറില് ബ്ലാക്ക്വുഡിനെ പുറത്താക്കി സ്റ്റോക്സ് കൂട്ടുകെട്ട് പൊളിക്കുകയും ചെയ്തു. സ്റ്റോക്സിന്റെ ഫോര് തടയാനുള്ള “മാരത്തണ്” ഓട്ടം കളിയോടുള്ള അര്പ്പണ മനോഭാവവും അദ്ദേഹത്തിന്റെ കായികക്ഷമതയുമാണ് പ്രകടമാകുന്നതെന്നാണ് ആരാധകര് പറയുന്നത്.