രഞ്ജി ട്രോഫിയില് ശേഷിക്കുന്ന മത്സരങ്ങളെല്ലാം ശ്രീശാന്തിന് നഷ്ടമായേക്കും. പരിശീലനത്തിനിടെ ഏറ്റ പരിക്കാണ് താരത്തിന് തിരിച്ചടിയായത്. താരത്തിന്റെ പരിക്ക് സാരമുള്ളതാണെന്നും വിശ്രമം വേണമെന്നുമാണ് പുറത്തുവരുന്ന വിവരം.
രഞ്ജി ട്രോഫിയില് ഗുജറാത്തിനെതിരായ മത്സരത്തിന് മുമ്പ് നടന്ന പരിശീലന സെഷനിടെ പരിക്കേറ്റതായും നടക്കാന് ബുദ്ധിമുട്ടുണ്ടെന്നും ശ്രീശാന്ത് സോഷ്യല് മീഡിയയിലൂടെ അറിയിച്ചിരുന്നു. ഇക്കാരണത്താല് തന്നെ ഗുജറാത്തിനെതിരായ മത്സരത്തില് താരം കളിച്ചിരുന്നില്ല.
ഇപ്പോഴിതാ ആശുപത്രിയില് കിടക്കുന്ന ചിത്രം ശ്രീശാന്ത് തന്നെ തന്റെ ട്വിറ്റര് അക്കൗണ്ടിലൂടെ പങ്കുവെച്ചിട്ടുണ്ട്. ഇതോടെയാണ് രഞ്ജിയില് ശേഷിക്കുന്ന മത്സരങ്ങളും താരത്തിന് നഷ്ടമാകുമെന്ന റിപ്പോര്ട്ടുകള് വരുന്നത്. ഈ വിഷയത്തില് താരമോ കെ.സി.എയോ യാതൊരു പ്രതികരണവും നടത്തിയിട്ടില്ല.
മേഘാലയയ്ക്കെതിരായ രഞ്ജിയിലെ ആദ്യ മത്സരത്തില് ശ്രീശാന്ത് കളിച്ചിരുന്നു. അന്ന് രണ്ട് വിക്കറ്റും താരം നേടി. രഞ്ജിയില് തകര്പ്പന് പ്രകടനമാണ് കേരളം കാഴ്ച്ചവെക്കുന്നത്. ആദ്യ മത്സരത്തില് മേഘാലയയെ ഇന്നിംഗ്സിന് തോല്പിച്ച കേരളം രണ്ടാം മത്സരത്തില് കരുത്തരായ ഗുജറാത്തിനെ എട്ട് വിക്കറ്റിനും തോല്പ്പിച്ചു. മധ്യപ്രദേശാണ് കേരളത്തിന്രെ അടുത്ത എതിരാളി.