ഏകദിനത്തില്‍ അതിവേഗം 2000 റണ്‍സ് തികച്ച് ഇന്ത്യന്‍ വനിതാ ക്രിക്കറ്റ് താരം സ്മൃതി മന്ദാന. ഏറ്റവും വേഗത്തില്‍ 2000 റണ്‍സ് പിന്നിടുന്ന മൂന്നാമത്തെ വനിതാ ക്രിക്കറ്റ് താരമായി ഇതോടെ സ്മൃതി മന്ദാന മാറി. വെസ്റ്റിന്‍ഡീസിനെതിരെ തകര്‍പ്പന്‍ പ്രകടനത്തിലൂടെ ഇന്ത്യയെ ജയത്തിലേക്ക് എത്തിച്ച പ്രകടനത്തോടെയാണ് മന്ദാന ഈ നേട്ടം സ്വന്തമാക്കിയത്. മത്സരത്തില്‍ 63 പന്തില്‍ ഒന്‍പത് ഫോറും മൂന്ന് സിക്‌സും സഹിതം 74 റണ്‍സാണ് മന്ദാന നേടിയത്.
51 ഇന്നിംഗ്സുകളില്‍ നിന്നാണ് ഏകദിനത്തില്‍ മന്ദാന 2000 റണ്‍സ് തികച്ചത്. വേഗത്തില്‍ 2000 റണ്‍സ് പിന്നിടുന്ന ഇന്ത്യന്‍ ക്രിക്കറ്റ് താരങ്ങളില്‍ ശിഖര്‍ ധവാന് പിന്നില്‍ രണ്ടാം സ്ഥാനത്തും എത്തി മന്ദാന. 48 ഇന്നിംഗ്സുകളാണ് 2000 റണ്‍സ് പിന്നിടാന്‍ ധവാന് വേണ്ടിവന്നത്.
ഇന്ത്യന്‍ നായകന്‍ വിരാട് കോഹ്ലിയേക്കാള്‍ വേഗത്തിലാണ് മന്ദാന ഈ നേട്ടം സ്വന്തമാക്കിയത് എന്ന പ്രത്യേകതയുമുണ്ട്. 53 ഇന്നിംഗ്സാണ് ഏകദിനത്തില്‍ 2000 തികയ്ക്കാന്‍ കോഹ്ലിക്ക് വേണ്ടിവന്നത്. ഗാംഗുലിക്ക് വേണ്ടിവന്നത് 52 ഇന്നിംഗ്സും.
45 ഇന്നിംഗ്സില്‍ നിന്നും 2000 തൊട്ട ഓസ്ട്രേലിയന്‍ മുന്‍ താരം ബെലിന്ദ ക്ലര്‍ക്കാണ് വനിതാ ക്രിക്കറ്റില്‍ ഇവിടെ ഒന്നാമത്. പുരുഷ ക്രിക്കറ്റില്‍ 40 ഇന്നിംഗ്സില്‍ നിന്ന് 2000 തൊട്ട് ഹാഷിം അംലയും.