ബിജെപി നേതാവിനെതിരെ ഗുരുതര ആരോപണവുമായി ഇന്ത്യന്‍ ക്രിക്കറ്റ് ഓള്‍റൗണ്ടര്‍ ശിവം ദുബെയുടെ ഭാര്യ അഞ്ജും ഖാന്‍ രംഗത്ത്. പ്രവാചകന്‍ മുഹമ്മദ് നബിയെ കുറിച്ച് തെറ്റായ പ്രസ്താവന നടത്തുകയും അദ്ദേഹത്തിനെതിരെ നുണകള്‍ പ്രചരിപ്പിക്കുകയും ചെയ്തതിന് ബിജെപി ന്യൂനപക്ഷ മോര്‍ച്ച നേതാവ് നാസിയ ഇലാഹി ഖാനെതിരെ നടപടിയെടുക്കണമെന്നാണ് അഞ്ജുവിന്റെ ആവശ്യം.
നാസിയ അലിഖാനെതിരെ സോഷ്യല്‍ മീഡീയയിലൂടെയാണ് അഞ്ജും രംഗത്തുവന്നത്. നാസിയ ഇലാഹി ഖാനെ അറസ്റ്റ് ചെയ്യണമെന്ന് അവര്‍ ആവശ്യപ്പെട്ടു. അഞ്ജുമിന്റെ സോഷ്യല്‍ മീഡിയ പോസ്റ്റ് വൈറലായിരിക്കുകയാണ്.
‘നബിയെ അപമാനിക്കുമ്പോള്‍ ദേഷ്യപ്പെടാതിരുന്നാല്‍ നിങ്ങളുടെ വിശ്വാസം നശിച്ചു. നിങ്ങളുടെ വിശ്വാസം ജീവനുള്ളതാണെങ്കില്‍, ഇത് റിപ്പോര്‍ട്ട് ചെയ്ത് അറസ്റ്റ് നാസിയ എലാഹിഖാന്‍ എന്ന് എഴുതൂ”
‘സുഹൃത്തുക്കളേ, നാസിയ ഖാനെതിരെ സംസാരിക്കേണ്ട സമയം അതിക്രമിച്ചിരിക്കുന്നു. അവള്‍ മുസ്ലീങ്ങള്‍ക്കെതിരെ സംസാരിച്ചു, ഇപ്പോള്‍ അവള്‍ നമ്മുടെ പ്രവാചകനെക്കുറിച്ച് അസംബന്ധം പറയുന്നു’ അഞ്ജും എഴുതി.
കുറച്ച് സമയത്തിന് ശേഷം അഞ്ജും തന്റെ പോസ്റ്റ് ഡിലീറ്റ് ചെയ്തു. പിന്നാലെ അഞ്ജുമിനെതിരെ നാസിയ ഖാന്‍ തിരിച്ചടിച്ചു. ‘ഓ മാഡം നിങ്ങള്‍ ഒരു ഹിന്ദുവിനെ വിവാഹം കഴിച്ചു. ഇസ്ലാം നിയമം അനുസരിച്ച്, നിങ്ങള്‍ ഇപ്പോള്‍ ഇസ്ലാമിന്റെ ഭാഗമല്ല. ഇന്ത്യന്‍ ക്രിക്കറ്റ് താരവും സിഎസ്‌കെ താരവുമായ ശിവം ദുബെയുടെ ഭാര്യ അഞ്ജും ദുബെയാണ്’ നാസിയ എക്‌സില്‍ കുറിച്ചു.