ദക്ഷിണാഫ്രിക്കന്‍ പര്യടനത്തിലെ ടെസ്റ്റ് പരമ്പര നഷ്ടപ്പെട്ടതിന്റെ കാരണം സന്നാഹ മത്സരങ്ങള്‍ കളിക്കാത്തതും പിച്ചിനോട് പൊരുത്തപ്പെടാനുള്ള സമയം ലഭിക്കാത്തതുമാണെന്ന് ഇന്ത്യന്‍ പരിശീലകന്‍ രവി ശാസ്ത്രി. കേപടൗണില്‍ നടന്ന ആദ്യ ടെസ്റ്റില്‍ പരാജയപ്പെട്ട സമയത്തും ബിസിസഐക്കെതിരേ ഈ വിമര്‍ശനം ഉര്‍ന്നിരുന്നു.
ദക്ഷിണാഫ്രിക്കന്‍ പര്യടനത്തിന് മുമ്പ് ഇന്ത്യ വിദേശ മത്സരം കളിച്ചത് ശ്രീലങ്കയിലാണ്. ഇന്ത്യയില്‍ നിന്നും കാര്യമായ വ്യത്യാസമില്ലാത്ത പിച്ചാണ് ശ്രീലങ്കയിലും ഉണ്ടായിരുന്നത്. അതേസമയം, തീര്‍ത്തും വ്യത്യസ്തമായ പിച്ചുള്ള ദക്ഷിണാഫ്രിക്കയിലേക്ക് ഇന്ത്യന്‍ ടീം എത്തിയത് മത്സരത്തിന് വിരലിലെണ്ണാവുന്ന ദിവസങ്ങള്‍ മാത്രം ബാക്കിയുള്ളപ്പോഴാണ്.
ബിസിസിഐയുടെ ഷെഡ്യൂളിങ്ങും ഫിക്‌സ്ചറുമാണ് ദക്ഷിണാഫ്രിക്കയില്‍ ഇന്ത്യന്‍ ടീം പതറാനുള്ള കാരണമെന്നാണ് പൊതുവെയുള്ള വിലയിരുത്തലുകള്‍. ഇതിനിടയിലാണ് രവിശാസ്ത്രിയും രംഗത്തെത്തിയത്. ടീമെന്ന നിലയില്‍ മികവ് പ്രകടിപ്പിച്ചെങ്കിലും പരമ്പരയ്ക്ക് മുന്നൊരുക്കം നടത്താനുള്ള സാഹചര്യം ഇന്ത്യയ്ക്ക് തിരിച്ചടിയായെന്നാണ്് ശാസ്ത്രി പറഞ്ഞത്.
ദക്ഷിണാഫ്രിക്ക പോലുള്ള ടീമുകളോട് അവരുടെ നാട്ടില്‍ കളിക്കുമ്പോള്‍ പത്ത് ദിവസം മുമ്പെങ്കിലും പിച്ചുമായും സാഹചര്യങ്ങളുമായും ഒരുങ്ങേണ്ടതായുണ്ട്. നിര്‍ഭാഗ്യവശാല്‍ ഇന്ത്യന്‍ ടീമിന് അത് സാധിച്ചില്ല. ശാസ്ത്രി കൂട്ടിച്ചേര്‍ത്തു.