അടുത്ത മാസം ആരംഭിക്കാനിരിക്കുന്ന ലങ്കന്‍ പര്യടനത്തിനായി ഇന്ത്യന്‍ സംഘം ഇന്നലെ ശ്രീലങ്കയ്ക്ക് തിരിച്ചിരുന്നു. മലയാളി താരങ്ങളായ സഞ്ജു സാംസണ്‍, ദേവ്ദത്ത് പടിക്കല്‍ എന്നിവര്‍ സംഘത്തിലുണ്ട്. ഇപ്പോഴിതാ താന്‍ ഇന്‍സ്റ്റഗ്രാമില്‍ പങ്കുവെച്ച ചിത്രത്തിന് താഴെ കമന്റുമായി എത്തിയ ദീപക് ചഹാറിന് സഞ്ജു നല്‍കിയ മറുപടിയാണ് വൈറലായിരിക്കുന്നത്.
ലങ്കയിലേക്കു യാത്ര തിരിക്കവെ എടുത്ത സെല്‍ഫി സഞ്ജു ഇന്‍സ്റ്റഗ്രാം പേജിലൂടെ പങ്കു വച്ചിരുന്നു. വിമാനത്തിന്റെയും ലങ്കന്‍ പതാകയുടെയും ഇമോജിയും ഇതോടൊപ്പമുണ്ടായിരുന്നു. ഈ ഫോട്ടോയ്ക്കു താഴെയായിരുന്നു എവിടേക്കാണെന്നു ചോദിച്ച് ചഹാര്‍ ഒന്ന് ട്രോളി നോക്കിയത്. ഇതിന് കിടുക്കാച്ചി മറുപടി സഞ്ജു നല്‍കുകയും ചെയ്തു.
ടീം ബസിന്റെ ബാക്ക് സീറ്റില്‍ നീയും കയറിക്കോയെന്നായിരുന്നു ചഹാറിന്റെ കമന്റിനു താഴെ സഞ്ജു കുറിച്ചത്. സഞ്ജുവിന്റെ മറുപടി ആരാധകരെ രസിപ്പിക്കുകയും ചെയ്തു. നിരവധി പേരാണ് പൊട്ടിച്ചിരിക്കുന്ന ഇമോജിയുമായി ഇതിനോടു പ്രതികരിച്ചിരിക്കുന്നത്.
മൂന്നു വീതം ഏകദിന ടി20 പരമ്പരകളാകും ഇന്ത്യ ശ്രീലങ്കയില്‍ കളിക്കുക. ജൂലൈ 13 ന് ഏകദിന മത്സരത്തോടെയാണ് പര്യടനം ആരംഭിക്കുക. ജൂലൈ 16, 19 തിയതികളില്‍ ബാക്കി രണ്ട് ഏകദിനങ്ങള്‍ നടക്കും. ഉച്ചക്ക് 1.30 നാവും മത്സരങ്ങള്‍ ആരംഭിക്കുക. ടി20 മത്സരങ്ങള്‍ ജൂലൈ 22, 24,27 തിയതികളില്‍ നടക്കും. വൈകിട്ട് 7 മണിക്കാണ് മത്സരങ്ങള്‍ ആരംഭിക്കുക.