ടെസ്റ്റ് ക്രിക്കറ്റില് വിരാട് കോഹ്ലിയുടെ വിരമിക്കലോടെ വലിയ വിടവാണ് ഇന്ത്യന് ടീമിലുണ്ടായത്. കോഹ്ലിയുടെ നാലാം നമ്പറില് ഇനി ആരാവും കളിക്കുകയെന്ന് ഉറ്റുനോക്കുകയാണ് ക്രിക്കറ്റ് പ്രേമികള്. ശുഭ്മാന് ഗില്ലോ, കെഎല് രാഹുലോ കോഹ്ലിയുടെ ബാറ്റിങ് പൊസിഷനില് കളിക്കുമെന്ന് റിപ്പോര്ട്ടുകളുണ്ടെങ്കിലും ആരാവും ഇറങ്ങുകയെന്ന കാര്യത്തില് സ്ഥിരീകരണമുണ്ടായിട്ടില്ല. കരുണ് നായരെ കോഹ്ലിക്ക് പകരക്കാരനായി ടീമില് ഉള്പ്പെടുത്തണമെന്ന് പറയുകയാണ് മുന് ഇന്ത്യന് താരം സഞ്ജയ് ബംഗാര്.
നാലാം സ്ഥാനത്ത് കരുണ് നായരാണ് നല്ല ഓപ്ഷനെന്ന് ബംഗാര് പറയുന്നു. ആഭ്യന്തര ക്രിക്കറ്റിന് മുന്ഗണന നല്കുകയും അത് ഒരു മാനദണ്ഡമായി ഉപയോഗിക്കുകയും ചെയ്യുന്നതിനെ കുറിച്ചാണ് എല്ലാവരും സംസാരിക്കുന്നതെങ്കില്, ടെസ്റ്റ് സ്ഥാനം തിരികെ ലഭിക്കാന് സാധ്യമായതെല്ലാം കരുണ് നായര് ചെയ്തിട്ടുണ്ട്, ബംഗാര് പറഞ്ഞു.
ഇക്കഴിഞ്ഞ രഞ്ജി ട്രോഫി സീസണില് വിദര്ഭ ടീമിനായി ശ്രദ്ധേയ പ്രകടനമാണ് കരുണ് കാഴ്ചവച്ചത്. 53.93 ശരാശരിയില് 863 റണ്സാണ് കരുണ് നായര് രഞ്ജിയില് അടിച്ചുകൂട്ടിയത്. നാല് സെഞ്ച്വറികളാണ് താരം നേടിയത്. രഞ്ജി ട്രോഫി ഫൈനലില് കേരളത്തിനെതിരെയും കരുണ് സെഞ്ച്വറി നേടിയിരുന്നു. കൂടാതെ ഐപിഎലില് ഈ സീസണില് ഡല്ഹി ക്യാപിറ്റല്സിനായി ഒരു മത്സരത്തില് ഇംപാക്ടുളള അര്ധസെഞ്ച്വറി പ്രകടനവും കരുണില് നിന്നുണ്ടായി.