ഇംഗ്ലണ്ടിനെതിരായ ടെസ്റ്റ് ക്രിക്കറ്റ് പരമ്പരയില് ഇന്ത്യ ജയിച്ചെന്നാണ് കരുതുന്നതെന്ന് ഓപ്പണര് രോഹിത് ശര്മ്മ. മാഞ്ചസ്റ്റര് ടെസ്റ്റ് സംബന്ധിച്ച തീരുമാനം എന്തെന്ന് അറിയില്ലെന്നും ഹിറ്റ്മാന് പറഞ്ഞു. ഇന്ത്യന് കോച്ച് രവി ശാസ്ത്രിക്കും അസിസ്റ്റന്റ് ഫിസിയോക്കും കോവിഡ് ബാധിച്ചതിനെ തുടര്ന്നാണ് മാഞ്ചസ്റ്ററിലെ അഞ്ചാം ടെസ്റ്റ് ഉപേക്ഷിച്ചത്.
ഇംഗ്ലണ്ടുമായുള്ള പരമ്പരയില് 2-1 എന്ന മാര്ജിനില് ഇന്ത്യ ജയിച്ചെന്നാണ് എന്റെ വിശ്വാസം. അഞ്ചാം ടെസ്റ്റിനെ ചുറ്റിപ്പറ്റി എന്താണ് സംഭവിക്കുന്നതെന്ന് അറിയില്ല. അടുത്ത വര്ഷം പരമ്പരയുടെ ഭാഗമാകാതെ ഏക ടെസ്റ്റാണോ, ഇംഗ്ലണ്ടുമായി ഇന്ത്യ കളിക്കുകയെന്നും രോഹിത് സംശയം പ്രകടിപ്പിച്ചു.
ഇംഗ്ലണ്ടിലെ എന്റെ പ്രകടനം മികച്ചതായിരുന്നു. എന്നാല് ഏറ്റവും മികച്ച പരമ്പര അതല്ല. ഇതിലും മികച്ച പ്രകടനം വരാനിരിക്കുന്നതേയുള്ളൂ. ലോക ടെസ്റ്റ് ചാമ്പ്യന്ഷിപ്പ് ഫൈനലിന് മുന്പുള്ള ഇടവേളയില് ഏതു തരത്തിലെ സാങ്കേതിക വിദ്യയും മനോനിലയും സ്വീകരിക്കണമെന്ന കാര്യത്തിലാണ് യത്നിച്ചത്. അക്കാര്യത്തില് ഏറെ മുന്നോട്ടുപോകാന് കഴിഞ്ഞതില് ആഹ്ലാദമുണ്ടെന്നും രോഹിത് പറഞ്ഞു.