സ്റ്റാര് പേസര് പാറ്റ് കമ്മിന്സിനെ ഓസ്ട്രേലിയന് ടെസ്റ്റ് ടീമിന്റെ ക്യാപ്റ്റനാക്കാന് ശരിയായ സമയം എത്തിയതായി ലെഗ് സ്പിന് ഇതിഹാസം ഷെയ്ന് വോണ്. അശ്ലീല സന്ദേശ വിവാദത്തില്പെട്ട ടിം പെയ്നിന്റെ പിന്ഗാമിയായി സ്റ്റീവ് സ്മിത്തിനെ നായകന്റെ ചുമതലയേല്പ്പിക്കാന് ക്രിക്കറ്റ് ഓസ്ട്രേലിയ നീക്കമിടുന്നതിനിടെയാണ് വോണ് നയം വ്യക്തമാക്കിയത്.
പാറ്റ് കമ്മിന്സിനെ ക്യാപ്റ്റനാക്കാന് പറ്റിയ സമയം ഇതാണ്. പെയ്നുമായി ബന്ധപ്പെട്ട പ്രശ്നം പുറത്തുവരുന്നതിന് മുന്പു തന്നെ അതേക്കുറിച്ച് ഞാന് ചിന്തിച്ചിരുന്നു- ഓസ്ട്രേലിയന് ടാബ്ലോയ്ഡായ ദ ഡെയ്ലി ടെലഗ്രാഫില് എഴുതിയ ലേഖനത്തില് വോണ് പറഞ്ഞു.
ഓസ്ട്രേലിയന് ക്രിക്കറ്റിന്റെ പോസ്റ്റര് ബോയ്യാണ് കമ്മിന്സ്. ലോകം മുഴുവനും കമ്മിന്സിനെ സ്നേഹിക്കുകയും ആരാധിക്കുകയും ചെയ്യുന്നു. കമ്മിന്സിനെ ഓസീസ് ടീമിന്റെ കടിഞ്ഞാണ് ഏല്പ്പിക്കണം. പെയ്നിന്റെ സ്ഥാനത്ത് മാത്യു വേഡിനേയോ ജോഷ് ഇന്ഗ്ലിസിനേയോ അലക്സ് കാരിയേയോ കൊണ്ടുവരണം. ഇന്ഗ്ലിസിനെയാണ് താന് കൂടുതല് പിന്തുണയ്ക്കുന്നതെന്നും വോണ് കൂട്ടിച്ചേര്ത്തു.