ഇന്നലെ ഗ്വാളിയോറിലെ ന്യൂ മാധവ്‌റാവു സിന്ധ്യ ക്രിക്കറ്റ് സ്റ്റേഡിയത്തിൽ ബംഗ്ലാദേശിനെതിരായ ആദ്യ ടി-20യിൽ അവരെ 7 വിക്കറ്റിന് പരാജയപ്പെടുത്തി ഗംഭീര വിജയം സ്വന്തമാക്കി ഇന്ത്യ. ബോളിങ്ങിലും ബാറ്റിംഗിലും പൂർണ ആധിപത്യം തന്നെയായിരുന്നു ഇന്ത്യ നടത്തിയിരുന്നത്. ഇതോടെ മൂന്ന് ടി-20 മത്സരങ്ങൾ അടങ്ങുന്ന പരമ്പര ഇന്ത്യ 1-0 ത്തിന് മുന്നിൽ നിൽക്കുകയാണ്.
മത്സരത്തിൽ മികച്ച പ്രകടനം നടത്തിയ താരങ്ങളിൽ ഒരാൾ ആണ് മലയാളി താരം സഞ്ജു സാംസൺ. 19 പന്തുകളിൽ നിന്ന് 6 ഫോറുകൾ അടക്കം 29 റൺസ് നേടി ടീമിൽ സ്ഥിരതയാർന്ന പ്രകടനം കാഴ്ച്ച വെച്ചു. ഓപ്പണിങ് സ്ഥാനം നിലനിർത്താൻ ലക്ഷ്യം ഇടുന്ന സഞ്ജു സാംസണിന്റെ ആദ്യ പടി വിജയിച്ചു എന്ന് ആരാധകർ വിലയിരുത്തുന്നു. പണ്ട് ഗൗതം ഗംഭീർ സഞ്ജുവിനെ കുറിച്ച് പറഞ്ഞ കാര്യം ഓർമിപ്പിച്ച് രംഗത്ത് എത്തിയിരിക്കുകയാണ് ഇന്ത്യൻ കമന്റേറ്റർ ആകാശ് ചോപ്ര.
ആകാശ് ചോപ്ര പറയുന്നത് ഇങ്ങനെ:
” സഞ്ജു സാംസണിനെ കുറിച്ച് നമുക്ക് സംസാരിക്കാം. അഭിഷേക് പുറത്താകുന്നത് വരെ മികച്ച പ്രകടനം നടത്തി എന്നാൽ അദ്ദേഹം പുറത്തായപ്പോൾ ടീമിനെ മുൻപിൽ നിന്ന് നയിച്ചത് സഞ്ജു ആയിരുന്നു. ഒരിക്കൽ ഗൗതം ഗംഭീർ പറഞ്ഞിരുന്നു നിങ്ങൾ ഇന്ത്യൻ ടീമിൽ സഞ്ജു സാംസണിനെ കളിപ്പിച്ചില്ലെങ്കിൽ അത് ഇന്ത്യയുടെ തീരാ നഷ്ടം തന്നെ ആകും എന്ന്. അദ്ദേഹം ഓപ്പണിങ്ങിൽ ഇറങ്ങാനുള്ള താരം തന്നെയാണ്” ആകാശ് ചോപ്ര പറഞ്ഞു.
ആദ്യ മത്സരത്തിൽ സഞ്ജു മികച്ച പ്രകടനം കാഴ്ച വെച്ചത് കൊണ്ട് അടുത്ത മത്സരത്തിലും അദ്ദേഹത്തിന് അവസരം ലഭിക്കും. ഇന്നലെ നടന്ന മത്സരത്തിൽ ഗ്രേറ്റ് സ്‌ട്രൈക്കർ ഓഫ് ദി മാച്ച് പുരസ്‌കാരം നേടിയത് സഞ്ജു സാംസൺ ആയിരുന്നു.